Bloomberg нашри талқини бўйича дунёнинг энг бой оилалари рейтингида жаҳондаги энг йирик улгуржи ва чакана савдо тармоғи — Walmart’га эгалик қилувчи Уолтонлар оиласи етакчилик қилди. Агентлик уларнинг бойлигини 238,2 миллиард долларга баҳолади.
Walmart’га бизнесмен Сэм Уолтон томонидан 1962 йилда асос солинган. Ҳозир бутун дунё бўйлаб дўконлари сони 10,5 мингдан ошади, компания даромади эса 559 миллиард долларни ташкил қилади. Уолтонлар оиласи тармоқ акцияларининг 48 фоизига эгалик қилади.
Энг бадавлат оилалар ўнлиги билан «РБК» фотогалереясида танишинг.
Виктория Марс (тўртинчи авлод вакиласи) — кичик Форрест Марс ва Виржиния Кретелланинг қизи. Унинг уч синглиси бор, булар — Марийке Марс, Памела Марс-Райт ва Валери Марс. Унинг отаси томонидан катта бобоси Франклин Кларенс Марс Mars Incorporated компаниясига 1911 йилда асос солган.
Марслар оиласи қандолат маҳсулотлари ва узоқ муддат сақланувчи озиқ-овқатлар ишлаб чиқарувчи Маrs компаниясига эгалик қилади, уларнинг бойлиги 141,9 миллиард долларга баҳоланади.
Кохлар оиласи — Американинг Коch Industries нефть-кимё корпорацияси эгаларидир. Уларнинг бойлиги 124,4 миллиард долларни ташкил этади.
Эрме оиласи Hermes француз модалар уйига эгалик қилади, давлати — 111,6 миллиард долларга тенг.
Саудия қироллик оиласи — Ал Сауд рейтингда бешинчи ўринда жойлашди, уларнинг бойлиги 100 миллиард долларга баҳоланмоқда.
Амбанилар оиласи Ҳиндистоннинг нефть қазиб олиш ва қайта ишлаш бўйича Reliance Industries холдингига эгалик қилади, давлати 93,7 миллиард долларга тенг.
Вертхаймерлар оиласи Франциянинг Chanel модалар уйи эгасидир. Уларнинг бойлиги 61,8 миллиард долларни ташкил қилади.
Жонсонлар оиласи — Американинг Fidelity Investments активларни бошқариш компанияси эгаси. Бойлиги 61,2 миллиард долларга тенг.
Томсонлар оиласига Thomson Reuters медиакомпанияси тегишли бўлиб, уларнинг давлати 61,1 миллиард долларни ташкил этади.
Бёрингерлар оиласи Германиянинг Boehringer Ingelheim фармкомпанияси эгасидир. Уларнинг бойлиги 59,2 миллиард долларга баҳоланмоқда.
Рейтингга жами 25 та оила кирди, улар орасида Германиянинг Аldi чегирма дўконлари тармоғига эгалик қилувчи Албрехтлар оиласи (51 миллиард доллар), Estee Lauder косметика бренди эгалари (49,3 миллиард доллар), Франциянинг Auchan савдо гигантига эгалик қилувчи Мюле оиласи (45,9 миллиард доллар), BMW Kvandt эгалари (42,3 миллиард доллар) ҳам кирди.
Bloomberg маълумотларига кўра, дунёдаги энг бой 25 та оиланинг жами давлати 1,7 триллион долларни ташкил қилади, бу 2020 йилдаги кўрсаткичдан 22 фоизга кўп демакдир.
Изоҳ (0)