Франция ташқи ишлар вазири Жан-Ив Ле Дриан АҚШ ва Австралиядаги элчиларини маслаҳатлашувлар учун Парижга чақириб олмоқчи. Бу ҳақда Франция Ташқи ишлар вазирлиги матбуот хизмати хабар берди.
Қайд этилишича, ТИВ вазири Франция президенти Эммануэль Макроннинг илтимосига биноан элчиларни чақириб олишга қарор қилган. Бу қарор 15 сентябрь куни Австралия ва АҚШ томонидан берилган баёнотларнинг ўта жиддийлиги билан оқланади, дейилади дипломатик идорада.
«Австралия ва Франция 2016 йилдан бери олиб бораётган океан даражасидаги сув ости кемаси лойиҳасидан воз кечиш ва АҚШ билан янги ядровий двигателли денгиз кучлари соҳасида ҳамкорлик қилиш имконини берадиган янги альянсни эълон қилишнинг оқибатлари бизнинг иттифоқимиз, шериклигимиз ва Ҳинд-Тинч океани минтақасининг Европа учун аҳамияти ҳақидаги тасаввурларимизга таъсир қилади», — дейилади ТИВ баёнотида.
Австралия ташқи ишлар вазири Марис Пейн Франция элчиси Жан-Пер Тебонинг Парижга чақириб олинишидан афсус билдирди.
Пейн Австралиянинг француз сув ости кемаларини сотиб олиш бўйича шартномани рад этишидан Франциянинг ҳафсаласи пир бўлганини тушунишини айтиб, лекин бу қарорни миллий хавфсизлик манфаатларини таъминлаш билан изоҳлади. Вазирнинг қўшимча қилишича, Канберра Париж билан муносабатини қадрлайди ва келгусида ўзаро мулоқотни давом эттиришга тайёр.
Ўз навбатида, Тебонинг таъкидлашича, Австралия Франция билан битимдан чиқиши мумкинлиги ҳақида маълум қилмаган. Элчининг айтишича, у шартноманинг бекор қилиниши ҳақида Австралия матбуотидан билган, ваҳоланки Канберрада ўз қарорини етказиш учун кўплаб имкониятлар бор эди.
Аввалроқ Австралия, АҚШ ва Буюк Британия янги мудофаа альянси — AUKUS’ни тузган эди. AUKUS’нинг илк йирик ташаббуси Австралияни атомли сувости флоти билан қуроллантириш бўлди. Янги ҳамкорлик фонида Австралия Франциянинг Навал Group ҳарбий кемасозлик компанияси билан тузган рекорд даражада қиммат шартномани тўхтатди.
Австралия уни 2016 йилда имзолаган, шартнома 12 та оддий сувости кемасини қуришни назарда тутган. Лойиҳага 90 миллиард Австралия доллари (66 миллиард АҚШ доллари) талаб қилиниб, бу шартнома Австралия денгиз флоти тарихидаги энг қиммати бўларди.
Франция ташқи ишлар вазири Жан-Ив Ле Дриан шартноманинг бекор қилинишини «орқадан пичоқ уриш» деб атаган. Шунингдек, бекор бўлган шартнома туфайли Франция АҚШ билан бирга Чесапик денгиз жангининг 240 йиллигига бағишланган тантаналарни нишонлашдан бош тортган.
Изоҳ (0)