Америкалик тадбиркор ва ихтирочи, Apple асосчиларидан бири Стив Возняк Privateer Space хусусий космик компанияси ташкил этилганини эълон қилди, деб ёзади Meduza.
Вознякнинг Twitter’да ёзишича, янги компания ўз рақобатчиларидан фарқли бўлади. Ўз твитига тадбиркор компания ҳақидаги видеони илова қилган. Унда Privateer Space компанияси Ripcord робототехника компанияси бош директори Алекс Филдинг билан ҳамкорликда ташкил этилгани айтилган. Ripcord веб-сайтига кўра, компания 2014 йилда NASA томонидан ишга туширилган.
Видеороликда таъкидланишича, Privateer Space «коинотнинг бутун инсоният учун хавфсиз ва очиқ бўлиши йўлида ҳаракат қилмоқда». Компаниянинг кейинги режалари 14—17 сентябрь кунлари Гавайининг Мау оролида бўлиб ўтадиган АМОS технология конференциясида маълум бўлади.
2018 йилнинг апрель ойида Возняк «РБК» телеканалига берган интервьюсида космик туризмнинг ривожланиши, хусусан, қанча одам бундай саёҳатни амалга оширишига боғлиқ бўлишини айтганди. «Мен кўплаб одамлар ва компаниялар космик саёҳатни арзон қилиш устида ишлашини истардим. Агар менда кемага ўтириб, Марсга бир томонлама чипта билан учиш имкони бўлганида, мен учган бўлардим», — деди у. Вознякнинг сўзларига кўра, келажакда космик агентликлар ва хусусий корхоналарнинг лойиҳалари доирасида одамлар бошқа сайёралардаги колонияларга кўчиб ўтиши мумкин бўлади, лекин улар Ерни оммавий равишда тарк этмайди.
Эслатиб ўтамиз, Virgin Galactic компанияси асосчиси, британиялик Ричард Бренсон 11 июль куни VSS Unity суборбитал ракетопланида коинотга муваффақиятли парвозни амалга ошириб, космик туризм даврини бошлаб берганди. У билан бирга икки учувчи ва яна уч нафар йўловчи коинотга чиқди. Парвоз яхши ўтди — кема мўлжалланган баландликка етиб борди, йўловчилар бир неча дақиқа вазнсизлик ҳолатида бўлди, шундан сўнг VSS Unity Ерга хавфсиз қайтиб тушди.
20 июль куни эса Amazon асосчиси Жефф Безос коинотда бўлиб қайтди. Бортида Безос ва яна уч нафар одам бўлган New Shepard ҳаво кемаси космосга чиқиб муваффақиятли қўнишни амалга оширди. New Shepard капсуласи космодромдан учгач, тахминан 350 минг фунт масофани босиб ўтди, Ер атмосферасини фазодан ажратиб турувчи Кармана чизиғидан (Ердан 100 километр узоқликда) ўзган ҳолда коинотга чиқди. Парвоз, тахминан, 11 дақиқа давом этган.
Изоҳ (0)