Пул сарфлашга ҳожат йўқ: Салонга бормай, уйда қилиш мумкин бўлган гўзаллик муолажалари

Аёл ва қизлар гўзал кўриниши учун, албатта, салонга бориши ҳамда мутахассисга мурожаат қилишига ҳожат йўқ. Мафтункор ва ўзига хос кўриниш учун уй шароитида гўзаллик муолажаларини амалга оширсангиз ҳам бўлади.

Салонга боришга ортиқча пул сарфламасдан уй шароитида ҳам маникюр қилсангиз бўлади. Бунинг учун сизга маникюр қиладиган воситалар керак бўлади. Эҳтиёткорлик билан четидаги териларни тозалаб, тирноқни тартибга келтиришингиз. Буни профессионал мутахассис ёрдамисиз ҳам эплаш мумкин.

Сочларни тиклаш ва даволаш

Салонларда профессионал ниқоблар ёрдамида сочларни парваришлаш ҳамда даволашни таклиф қилинади. Бунинг учун эса табиийки, етарли миқдорда пул сарфланади. Аммо сиз сартарош тавсиясига биноан мустақил равишда ўзингиз амалга оширишингиз мумкин. Харид қилиб олган ниқоб учун воситадан эса узоқ вақт мобайнида фойдалансангиз бўлади. Қолаверса, сочларни парвариш қилиш бир-бир сартарошхонага борганда эмас, доимий равишда амалга оширилиши керак. Уйда эса бунинг уддасидан чиқса бўлади.

Тирноқдаги шеллакни ўчириш

Салонга бориб, маблағ сарфлаб шеллакни ўчиртиришдан кўра уни уйда амалга оширишингиз мумкин. Бунинг учун лак ўчиришда фойдаланадиган суюқлик керак бўлади. Суюқлик билан намланган пахта дискини ҳар бир бармоқ устига қўйинг, устидан фольга қоғозини 10 дақиқага ўраб қўйинг. Вақт ўрганидан кейин ёғочдан ишланган махсус таёқча билан лакни ўчиринг.

Юзни тозалаш

Уй шароитида фойдаланса бўладиган махсус электрли чўтка билан юзни тозалаш муолажасини амалга оширса бўлади. Чўтка юзни тозалашга, уни ортиқча ёғ ва ялтирашлар, шунингдек, майда чандиқлардан холос қилишга ёрдам беради. Мунтазам равишда фойдаланилса, 2-3 ҳафтадан кейинроқ самарали натижа яққол кўзга ташланади. Ушбу воситани турли брендлардан исталган нархда харид қилса бўлади.

Селюллитга қарши муолажа

Ушбу муолажани уй шароитида амалга ошириш учун профессионаллик эма сифатли косметик воситалар керак бўлади. Терини таранглаштиришга мўлжалланган ушбу муолажани бир нечта турини бошқалар ёрдамисиз амалга оширса бўлади. Салонга боришга пул сарфлагандан кўра, яхшиси ушбу муолажани уйда мустақил бажаринг. Бунинг учун асални терига суртиб устидан плёнка билан ўранг. Вақт ўтганидан кейин ювиб ташланг.

Қошларни тартибга келтириш

Қошларни тартибга келтириш учун мутахассисга бир марта бориб ўрганиб олишнинг ўзи кифоя. Шундан кейин ортиқча қош толаларини тартибга келтириб, мутахассис келтирган шаклни сақлаб қолинг. Қолаверса, бўёқни кўз ва соч рангига мослаб, бўяшингиз мумкин.