Эрмитаж музейи «Сизнинг токенингиз Эрмитажда» лойиҳаси доирасида Binance криптовалютаси орқали музей коллекциясидан ўрин олган бешта картинанинг NFT-токенларини сотади. Бу ҳақда музей сайтига таяниб Esquire хабар берди.
Аукцион орқали Леонардо да Винчининг «Мадонна Литта», Жоржоненинг «Юдифь», Винсент Ван Гогнинг «Настарин бутаси», Василий Кандинскийнинг «VI композиция», Клод Моненинг «Монжерондаги боғ бурчаги» картиналарининг нусхаси сотилади. Санъат асарлари барчасининг рақамли нусхалари икки нусхада яратилган: улардан бири Эрмитажда қолади, иккинчиси эса Binance’да сотилади. Нусхаларда сана, вақт ва жойни Эрмитаж бош директори Михаил Пиотровский имзолаган. Харидор уларни имзолаш жараёни тасвирланган видеони ҳам қўлга киритади.
Ҳар бир лотнинг бошланғич нархи 10 минг долларни ташкил этади. Ҳозирда Anonymous_8qkо ники остидаги фойдаланувчи «Мадонна Литта» картинасига 15 минг доллар тўлашга тайёр.
Аукцион 7 сентябрь куни Москва вақти билан соат 15:00 га қадар давом этади. Сотувдан тушган маблағларнинг барчаси музейга йўналтирилади.
Аввалроқ АҚШда 10 сонияли видеоролик 6,6 миллион долларга, Sotheby’s аукциони орқали рақамли аватар 11,7 миллион долларга сотилгани тўғрисида хабар берилганди.
Мавзуга доир: Тошнинг NFT-сурати 1,3 млн долларга сотилди
Изоҳ (0)