Фарғонада маст ҳайдовчи бошқарган Nexia ағдарилиши оқибатида 3 киши вафот этди
Фарғона вилояти Данғара туманида Nexia автомобили ағдарилиб кетди. Бу ҳақда «Янги Давр» кўрсатувида хабар қилинди.
Қайд этилишича, ҳолат Данғара тумани ҳудудидан ўтувчи 4К-888Г маҳаллий автомобиль йўлининг 3-километрида соат 00:10 атрофида содир бўлган. Маст ҳолатда бўлган Nexia ҳайдовчиси машина тезликни ошириб, бошқарувни йўқотиши оқибатида ағдарилиб кетган.
Қайд этилишича, йўл-транспорт ҳодисаси оқибатида ҳайдовчи ва бир нафар йўловчи воқеа жойида, яна бир йўловчи шифохонада вафот этган.
Машина салонидаги икки нафар йўловчи тан жароҳатлари билан туман марказий шифохонасига юборилган.
Ҳозирда ҳодиса сабаблари юзасидан суриштирув ишлари олиб борилмоқда.
Бундан аввал Наманганда Damas уриб кетиши оқибатида 47 ёшли фуқаро шифохонада вафот этгани, Наманганда йўлдан ўтаётган 22 ёшли пиёда Nexia уриб юбориши оқибатида вафот этгани ҳамда Наманганда Damas уриб кетиши оқибатида 12 ёшли қиз вафот этгани ҳақида хабар берилганди.
