Ижтимоий тармоқларда Бразилиянинг Рио-Гранди-ду-Сул штатида ХХ асрнинг ўрталарига тегишли ноёб автомобиллар коллекцияси сақланган ташландиқ бино суратлари тарқалди. Ноодатий коллекцияни рухсатсиз шахсий ҳудудга кирган 15 ёшли ўсмирлар топган бўлиб, бу ҳақда улар WhatsApp орқали дўстларига «улашган» ва маҳаллий полиция эътиборига тушган, деб хабар беради Motor.
Ташландиқ бино хусусий музей бўлиб, унда маҳаллий коллекционер 1920—1970 йилларга тегишли турли автомобилларни сақлаган. Қалин чанг қатлами остида қолган транспорт воситалари орасида ноёб Ford Модель Т, Chevrolet Corvair ва Styleline, шунингдек, Renault Dauphine, Morris Oxford ва Hudson Hornet ўрин олган. Узоқ йиллар давомида бир жойда турганига қарамай, автомобилларнинг аксарияти яхши ҳолатда сақланган.
Иккинчи қаватга кўтарилган ўсмирлар янада ноёб нусхаларга дуч келган. Деярли чириб кетган ёғоч пол устида Austion A90 Atlantic кабриолети, Chrysler Airflow купеси, ўтган асрнинг ўрталарига тегишли бир нечта Ford минивени, шунингдек, Renault Gordini, Ford Consul седани ва ҳатто уч ғилдиракли Hennessey Goliath турган.
Хусусий музей ҳеч қачон кенг омма учун ишламаган. Бинода йиғилган автомобилларни фақатгина унинг эгаси ва яқин дўстлари томоша қилган. Коллекционернинг ўлимидан сўнг икки қаватли музей мерос бўлиб унинг қариндошларига ўтган ва бино қаровсиз қолиб кетган.
Бинога ноқонуний кириш амалга оширилгач, бунга Бразилия полицияси қизиқиш билдирган. Идора ходимлари музей эгаларини содир бўлган ҳолат ҳақида огоҳлантирган, бир неча кундан сўнг ноёб автомобилларнинг бир нечтаси сотувга қўйилган. Ўзганинг ҳудудига кирган ўсмирларнинг ота-оналари билан суҳбат ўтказилади.
Аввалроқ Калифорнияда ноёб Porsche’лар билан тўла ҳашаматли гаражга эга уй сотувга қўйилгани, Кипрда Mazda RX’нинг энг катта хусусий коллекцияси реставрацияга муҳтож ҳолда топилгани тўғрисида хабар берилганди.
Изоҳ (0)