Андижон вилояти бўйича 2018 йилнинг 1 августидан 2021 йилнинг 30 июнига қадар жами 36 минг 645 нафар ҳайдовчи ҳаракат тезлигини меъёридан ошириши натижасида фоторадарларга тушган. Бу ҳақда вилоят ЙҲХБ ахборот хизмати маълумотига таяниб, «Дарё» мухбири Умиджон Мамарасулов хабар берди.
Таъкидланишича, содир этилаётган йўл-транспорт ҳодисаларига ҳайдовчиларнинг йўлларда йўл ҳаракати қоидаларига ва белгиланган тезликка риоя қилмаслиги сабаб бўлмоқда. Бундай салбий ҳолатларнинг олдини олиш борасида вилоят Йўл ҳаракати хавфсизлиги бошқармаси томонидан йўлларда ходимларнинг етарлича хизмат олиб боришлари ташкил этилган. Шундай бўлса-да, ҳудуддаги барча йўлларни қамраб олиш ҳамда назоратини олиб бориш имконияти бўлмаяпти. Шу сабабли автоматик «онлайн» тарзда ишловчи ҳамда тезликни аниқлаш имкониятига эга фото-видео фиксацияли камералар ўрнатилиб, йўл-транспорт ҳодисаларининг олди олинмоқда.
«Вилоят ҳокимлиги захирасидан ажратилган маблағлар эвазига 2018 йилнинг сентябрь ойида ‘Мониторинг маркази’ ва 7 дона қўзғалмас автоматик қоидабузарлик камераси, 2019 йилнинг февраль ойида эса онлайн тартибда ишловчи AvtoCon русумли 4 дона мобил автоматик тезлик ўлчаш камераси олиб келиниб ўрнатилган. 2018 йилнинг 1 августидан 2021 йилнинг 30 июнига қадар ушбу автоматик тарзда ишловчи фоторадарлар вилоят бўйича жами 36 минг 645 та белгиланган ҳаракат тезлигини меъёридан ошириш бўйича қоидабузарликларни аниқлаган. Натижада белгиланган жарималарнинг 8 миллиард 926 миллион 285 минг сўми ундирилган», — дейди вилоят ЙҲХБ ходими Диёрбек Абдураззоқов.
Қўшимча қилинишича, йил охирига қадар йўл-транспорт ҳодисаларининг олдини олиш, транспорт воситаларининг ҳаракатланиши давомида йўл ҳаракати қоидаларига амал қилишларини автоматик тарзда назорат қилувчи 10 дона фоторадар ҳам фоторадар муляжи харид қилиш режалаштирилган бўлиб, маҳаллий бюджет маблағлари ҳисобидан 3 миллиард 200 миллион сўм ажратиш белгиланган.
Изоҳ (0)