Афғонистон вице-президенти Амрулла Солиҳ ўзини қонуний давлат раҳбари деб эълон қилди. Бу ҳақда Meduza хабар бермоқда.
Солиҳ Twitter’да ёзишича, Афғонистон Конституциясига мувофиқ, президент бўлмаган ҳолатда давлат раҳбари вазифасини бажариш вице-президент зиммасига ўтади.
Солиҳнинг таъкидлашича, ҳозир у мамлакат ҳудудида бўлиб, дунё етакчиларидан кўмак олиш учун улар билан алоқалар ўрнатмоқда.
Шунингдек, Солиҳ афғонистонликларни «Толибон»га қаршилик кўрсатишга қўшилишга чақирди. «Биз Афғонистон Вьетнам эмаслигини, ‘Толибон’ эса ҳатто заррача Вьетконг армияси эмаслигини исботлашимиз керак», — деди сиёсатчи.
Вьетконг — Вьетнамдан Америка қўшинлари олиб кетилганидан кейин унинг жанубий қисмини ўз назорати остига олган партизанлар.
Маълум қилинишича, Амрулла Солиҳ кучлари Кобулдан шимолда жойлашган Парвон вилояти маркази Чорикор шаҳрида туманлардан бирини «Толибон»дан олиб қўйишга муваффақ бўлган. Бу ҳақда «РИА Новости»га Кобулдаги ҳарбий манбаси маълум қилган. Унинг айтишича, айни пайтда Панжшер вилоятида жанглар кетмоқда.
Агентлик манбасига кўра, Панжшер ҳудудига Афғонистон армиясининг генерал Абдулрашид Дўстум раҳбарлигидаги ўн минг ҳарбий хизматчиси йўл олган.
Икки кун аввал Солиҳ ўз Twitter’ида ёзиб, «Толибон» жангариларига ҳеч қандай вазиятда таслим бўлмасликка ва Аҳмад Шоҳ Маъсуд («Толибон» билан жанг қилган Шимолий альянс раҳбари, 2001 йил сентябрда ўлдирилган) хотирасига хиёнат қилмасликка ваъда берганди.
«Толибон» 15 август куни Кобулни жангсиз эгаллаб олди, шундан кейин ҳукумат вакиллари шаҳарни тарк этди. Афғонистон президенти Ашраф Ғани мамлакатдан қочиб кетди, кейинроқ унинг ўзи буни «қирғиннинг олдини олиш» истаги билан изоҳлади. У ҳозир қаерда экани номаълум. Ғани Тожикистон, Ўзбекистон ёки Уммонга учиб кетгани ҳақида турли хабарлар тарқалганди.
Изоҳ (0)