Қорақалпоғистоннинг Нукус шаҳридаги «Сазан» кафесида 2021 йил 1 август куни мижоз ва кафе эгаси ўртасида жанжал содир бўлди, дея хабар бермоқда ЎзА.
Қайд этилишича, овқатланиш жойига келган Э.М. исмли мижоз кафе эгаси билан жанжаллашиб қолган. Оқибатда у тан жароҳати туфайли шифохонага олиб кетилган. Аммо у жонлантириш бўлимига ўлик ҳолда етказилган.
Мазкур воқеа юзасидан Ички ишлар вазирлиги баёнот берди. Унга кўра, Нукус шаҳри «Қутли макан» МФЙда жойлашган «Сазан» кафесидаги жанжал бўйича суриштирув олиб борилмоқда.
Нукус шаҳрида истиқомат қилувчи фуқаро У.К.га ИИВ ҳузуридаги Тергов бошқармаси томонидан Жиноят кодексининг 104-моддаси 3-қисми, «д» банди (жабрланувчининг ўлишига сабаб бўлган қасддан баданга оғир шикаст етказиш) билан жиноят иши қўзғатилиб, айблов эълон қилинган. Унга қамоқ эҳтиёт чораси қўлланилган.
Бундан аввал Тошкентда қовун-тарвуз сотувчиси ва ИИБ ходимлари ўртасида жанжал акс этган видео юзасидан изоҳ берилгани, Андижонда қимордаги қарзи сабаб қўшнисини ўлдириб, ҳожатхона яқинига кўмиб қўйган йигит 14,5 йилга қамалгани ҳамда Қашқадарёда «участкавой»лар олиб кетган фуқаро 18 соатдан сўнг уйидагиларга ўлик ҳолда қайтарилгани ҳақида хабар берилганди.
Изоҳ (0)