Ўзбекистон футбол ассоциацияси (ЎФА) миллий терма жамоага янги мураббий танлашда португалиялик мутахассис Карлуш Кейруш билан ҳам музокара ўтказгани маълум бўлди. Бу ҳақда ЎФА медиа бўлими раҳбари Даврон Файзиев маълум қилди.
Файзиевнинг таъкидлашича, ЎФА кўплаб номзодлар қатори Кейруш билан ҳам боғланган. Бироқ мутахассис оилавий сабаблар билан Мозамбикда экани ва айни вақтда терма жамоани қабул қила олмаслигини билдирган.
Аввалроқ Ўзбекистон терма жамоасига словениялик мутахассис Сречко Катанец бош мураббий бўлиши маълум қилинганди.
Эслатиб ўтамиз, 2018 йилда Кейруш ЖЧ—2018 мусобақасидан кейин Ўзбекистон терма жамоасига бош мураббийи бўлиши мумкинлиги ҳақида хабарлар янграганди. Бироқ кейинчалик мутахассис Эрондан кетмади ва Ўзбекистон терма жамоасига Эктор Купер олиб келинди.
2019 йилда Кейруш Колумбия терма жамоаси устозига айланди. Қониқарсиз натижалардан кейин 2020 йилда Колумбиядан истеъфога чиқарилди. Карлуш мураббийлик фаолияти давомида Эрон, ЖАР, БАА ва Португалия каби терма жамоалар, «Реал Мадрид», «Манчестер Юнайтед» (ёрдамчи мураббий), «Нагоя Грампус» ва «Спортинг» сингари клубларда ишлаган.
Изоҳ (0)