Голливуд юлдузи Женнифер Энистон вакцина олмаган дўстлари билан мулоқот қилишни тўхтатди. У коронавируснинг дельта штаммини юқтириб олишдан қўрқмоқда

Голливуд юлдузи Женнифер Энистон ўзининг Instagram’даги саҳифаси орқали нима сабабдан вакцина олмаган дўстлари билан мулоқот қилишни тўхтатганига изоҳ берди, деб ёзади Esquire.

«Агарда сизда ушбу штамм (дельта — таҳр.) бўлса, уни барибир менга юқтира оласиз. Мен бироз касал бўлишим мумкин, аммо шифохонага тушиб қолмайман ва вафот этмайман. Лекин вакцина олмаган ва саломатлиги бузилган (ёки бирор касаллик билан оғриган) бошқа инсонга юқтиришим, шу орқали унинг ҳаётини хавф остида қўйишим мумкин», — деб ёзади актриса.

«Ҳозирда фақатгина ўзимизни ўйлашимиз керак эмас», — дея якунлайди Энистон.

Актрисанинг ўзи май ойида тўлиқ вакцинациядан ўтган. «АҚШда коронавирусга қарши вакциналар борлиги сабаб жуда омадимиз келди. Афсуски, ҳамма ерда ҳам бундай эмас… ва биламизки, ҳар биримизнинг соғлиғимиз бошқалар саломатлигига таъсир кўрсатади», — деб ёзган эди ўшанда актриса.

Аввалроқ InStyle журналига берган интервьюсида актриса вакцинациядан ўтмаган дўстлари билан мулоқот қилишни тўхтатганини маълум қилганди.