Ўзбекистон халқ артистлари Юлдуз Усмонова, Озодбек Назарбеков, хонанда Бунёдбек Саидов ҳамда яна бир неча санъаткорлар Марказий Осиё давлатлари раҳбарларининг навбатдаги Маслаҳат учрашувининг бадиий қисмида чиқиш қилиш учун Туркманистонда бўлиб турибди. Бунёдбек Саидов Instagram саҳифаси орқали жонли эфир ташкиллаштириб, кузатувчиларини Юлдуз Усмонова билан юзлаштирди. Жонли эфирда Юлдуз Усмонова ижтимоий тармоқ фойдаланувчиларини қизиқтирган саволларга жавоб берди, шунингдек, улар сўраган қўшиқларни ҳам куйлаб берди. Ўзбекистон халқ артисти ўз навбатида кутилаётган президентлик сайловларида кимга овоз бериши ҳақида ҳам гапириб ўтди.
«Мен бу борада бир нарсани айтиб қўяй. Пружинани босиб-босиб, қўйиб юборсанг, у узоққа отилиб кетади. Мана ҳозир тобора ривожланяпмиз, балки Ўзбекистон учун яшаб ўтган кунларимиз керак бўлгандир. Ҳозир бизда шунақа ўсиш кетяпти, ҳамма жой чиройли, одамлар эркин, улар нима ўйлашидан, қандай фикр билдиришдан қўрқмаяпти. Бу жуда яхши. Ҳақиқатан ҳам, ҳаммаси яхши. Агар пахта қўя олганимда, қалинидан қўярдим.
Шунчаки, Аллоҳ ризолиги учун миннатдорчилигимни айтмоқчиман. Менга энди ишонмайсизлар, агар Аллоҳга ҳам ишонмасанглар, ўзларинг биласизлар. Пошшойимизга миннатдорчилик билдирмоқчиман. Дуоларимда шу одам. Ҳожи ота, ҳожи оналар, ҳожи ака, ҳожи опалар, қизларимиз бор ибодатдаги — ҳаммаларинг дуо қилинглар. Шу одам мана шу кетишда уёқ-буёққа бурилмай, мана шундай кетаверсинлар. Демократиямиз шундай кетаверсин.
Мен шундай қўрқаман бузилиб қолмасин йўлимиз, машинамиз тормоз олиб, тутаб қолмасин, деб. Ҳозир яхши кетяпмиз. Шунинг учун мана шу сайловда мен шу одам биланман. Жуда яхши одам. Кўз тегмасин! Юртимизга, эркинлигимизга кўз тегмасин, дуо қилинглар. У одамни ҳам дуо қилинглар — пошшойимизни, чарчаб қолмасин. Назар чарчатади. Назар бизни чарчатиб йиқитади-ю, Аллоҳ ёмон кўзлардан асрасин», — дейди Юлдуз Усмонова.
Ўзбекистон Президенти сайловлари 2021 йил 24 октябрь куни ўтказилади. 6 август ҳолатига кўра, Президент сайловларида иштирок этиш учун 3 та партия ўз номзодини — Экопартия томонидан партия марказий кенгаши ижроия қўмитаси раиси Нарзулло Обломуродов, «Адолат» социал-демократик партияси томонидан партия сиёсий кенгаши раиси Баҳром Абдуҳалимов, Миллий тикланиш» демократик партияси томонидан партия етакчиси, Олий Мажлис Қонунчилик палатаси спикери ўринбосари Алишер Қодиров тавсия қилинди. ХДП ва ЎзЛиДеП ўз номзодини ҳозирча тавсия қилмади. Ўзбекистоннинг амалдаги Президенти Шавкат Мирзиёев номзоди 2016 йилги сайловларда ЎзЛиДеПдан илгари сурилганди.
Аввалроқ Юлдуз Усмонова «запрет»дан олиб чиққани учун президентнинг тўнғич қизи Саида Мирзиёевага миннатдорчилик билдирган эди.
Изоҳ (0)