Самарқанд ва Қашқадарё вилоятида пул эвазига ўқишга киритиб қўйишни ваъда қилган шахслар қўлга олинди, дея хабар қилмоқда Бош прокуратура ҳузуридаги департамент.
Маълум қилинишича, департаментнинг Қарши туман бўлими ҳамда ДХХнинг Косон туман бўлими томонидан ўтказилган тезкор тадбирда фуқаро М.Ж. фирибгарлик йўли билан ўзганинг мулкини қўлга киритиш мақсадида фуқаро Н.ни 700 АҚШ доллари эвазига Қирғизистондаги олий таълим муассасаларидан бирига танишлари орқали ўқишга киритиб қўйишни ваъда қилиб, шундан 200 АҚШ долларини олган вақтида ашёвий далиллар билан ушланган.
Худди шундай департамент ҳамда ДХХнинг Самарқанд вилояти бошқармалари томонидан ўтказилган тезкор тадбирда Самарқанд темир йўл техникуми талабалар ётоқхонаси тарбиячиси вазифасида ишловчи Ў.Б. фуқаро Ш.ни ушбу техникумига ўқишга киритиб қўйиш эвазига 1 000 АҚШ долларини фирибгарлик йўли билан олган вақтида ашёвий далиллар билан ушланган.
Шу каби департамент ҳамда Миллий гвардиянинг Самарқанд вилоят бошқармалари томонидан ўтказилган тезкор тадбирда Самарқанд шаҳридаги жамоат саломатлиги техникуми ўқитувчиси С.Х. фуқаро Д.нинг қизини танишлари орқали ушбу техникумга ўқишга киритиб қўйиш эвазига 1 000 АҚШ долларини фирибгарлик йўли билан олган вақтида ашёвий далиллар билан ушланган.
Ҳозирда мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Бундан аввал Фарғонада фуқарони 2 минг доллар эвазига Фарғона политехника институтига ўқишга киритиб қўйишни ваъда қилган шахс ушлангани, Сурхондарё ва Фарғонада фуқароларни ўқишга киритиб қўйиш эвазига пул сўраган талабалар ушлангани ҳамда Қорақалпоғистонда 23 минг доллар эвазига Қорақалпоқ давлат университетига ўқишга киритиб қўйишни ваъда қилган шахс ушлангани ҳақида хабар берилганди.
Изоҳ (0)