Бухорода «Асакабанк» собиқ мансабдорлари Осиё тараққиёт банки ажратган 2 млн долларни талон-торож қилгани аниқланди

Бухоро вилоятида «Асакабанк» филиали собиқ мансабдорлари ўзгалар билан тил бириктириб, Осиё тараққиёт банки томонидан Ўзбекистонга ажратилган 2 миллион доллар миқдорида пулларни ўзлаштиргани аниқланди, дея хабар бермоқда вилоят ИИБ матбуот хизмати.

«Асака банк» АЖ Бухоро вилояти филиали собиқ мансабдори Ўзбекистон Президентининг «Осиё тараққиёт банки иштирокидаги ‘Мева-сабзавотчилик тармоғида қўшилган қиймат яратиш занжирини ривожлантириш’ лойиҳасини амалга ошириш тўғрисида»ги қарори асосида «Осиё тараққиёт банки» маблағлари ҳисобидан молиялаштирилган 2 миллион АҚШ доллари миқдоридаги имтиёзли кредит маблағларини сохта ҳужжатлар асосида фирибгарлик йўли билан қўлга киритиш мақсадида бир гуруҳ шахслар, яъни «Г.Б.А.» МЧЖ раҳбари, «Асакабанк» АЖ Бухоро вилояти филиали бошқа мансабдорлари, «Асакабанк» АЖ бош офиси мансабдор шахслари ҳамда «К.С» МЧЖнинг мансабдорлари билан ўзаро жиноий тил бириктирган.

Улар «Асакабанк»нинг 2017 йилга мўлжалланган кредит сиёсатида белгиланган кредит ажратишнинг умумий мезони талабларига зид равишда, кредит суммасининг гаров таъминоти билан етарли миқдорда таъминланмагани била туриб, кредит йиғма жилддаги айрим ҳужжатларни қалбакилаштириш йўли билан 2 миллион АҚШ доллари миқдоридаги кредит маблағларини фирибгарлик йўли билан қўлга киритиш ҳамда мансаб сохтакорлигида ифодаланган хатти-ҳаракатлари билан кредитнинг қайтарилишини таъминотсиз қолдириб, давлат ва банк манфаатларига кредитнинг асосий қисми тўланмагани оқибатида 1 миллион 282 минг 630 АҚШ доллари (эквивалентда 13 миллиард 579 миллион 14 минг 62 сўм) ва фоиз ҳамда пеня қарздорлиги ҳисобидан 358 минг 84 АҚШ доллари (эквивалентда 3 миллиард 790 миллион 986 минг 253 сўм) миқдорида зарар етказган.

Мазкур ҳолат юзасидан Жиноят кодексининг 168-моддаси 4-қисми (жуда кўп миқдорда) билан жиноят иши қўзғатилиб, дастлабки тергов ҳаракатлари олиб борилмоқда.

Бундан аввал Жиззахда 123 млн сўм кредит маблағларни талон-торож қилиб ўзлаштирган раҳбарга жиноий иш қўзғатилгани, Ўзбекистондаги иккита ОТМ бухгалтерлари 22,5 млрд сўмни ўзлаштирилгани аниқлангани ҳамда Қўрғонтепадаги деҳқон бозори масъуллари 360 млн сўмга яқин пул маблағларини талон-торож қилгани аниқлангани ҳақида хабар берилганди.