2021 йилнинг июнида Буюк Британияда суратга олиш ишлари бошланган «Индиана Жонс» фильмининг 5-қисмига оид янги маълумотлар пайдо бўлди. Лойиҳада юлдузлар сони ҳаддан ортиқ бўлса-да, унга Антонио Бандерас ҳам келиб қўшилди, деб хабар беради «Film.ru». У ҳозирча қайси ролни ижро этиши номаълум, аммо етакчи роллардан бири бўлиши тахмин қилинмоқда.
Янги фильмда Харрисон Форд саргузашт ишқибози ролига қайтади, шунингдек, унга «Ярамас» сериалининг муаллифи Фиби Уоллер-Бриж ва Мадс Миккельсен келиб қўшилган.
Стивен Спилбергнинг режиссёрлик мажбуриятини ўзига Жеймс Мэнголд («Логан») олган, франшиза яратувчиси эса фақат продюсер бўлиб қолган. Саганинг бешинчи қисми саундтреки устида фильмнинг қолган қисмлари учун қўшиқ яратган Жон Уильямс иш олиб боради.
Ҳозирча фильмнинг сюжети ошкор этилмаган, премьераси эса 2022 йилнинг 29 июнига мўлжалланган.
Эслатиб ўтамиз, 2020 йилнинг июнида Empire журнали ўз обуначилари ўртасида ўтказилган сўров натижаларига таяниб, тарихдаги энг буюк киноқаҳрамон номини эълон қилганди. Мазкур рейтингнинг юқори поғонасидан Харрисон Форд ижросидаги археолог Индиана Жонс қаҳрамони ўрин олган.
Изоҳ (0)