Тошкент метрополитени ходимлари ойлигини ошириш режалаштирилмоқда

Тошкент метрополитени ходимлари ойлик маошларни ошириш режалаштирилмоқда. Бу ҳақда «Ўзбекистон 24» телеканали репортажидан маълум бўлди.

Репортажда пойтахт метроси ишчиларининг 2021 йилнинг биринчи чораги бўйича ўртача ойлик иш ҳақлари ва уларни ошириш ҳақида маълумот кадрга тушиб қолган. Унга кўра, метрополитен ишчи ходимларининг ўртача иш ҳақи 2,1 миллион сўмни, «Ўзбекистон темир йўллари» ишчи ходимлариники эса 4 миллион сўмни ташкил этади.

Метрополитен ишчилари ойликларини сентябрда 3,1 миллион сўмгача, ноябрь ойида эса 3,7 миллион сўмгача ошириш режалаштирилмоқда.

Эслатиб ўтамиз, 7 май куни журналистлар учун ташкил этилган пресс-турда ОАВ вакилларига интервью берган Тошкент метрополитени раҳбари Ойбек Худойқулов метро ходимлари ва машинистларнинг маоши қанча эканлигини айтиб ўтганди. «Машинистларнинг маоши ўртача 3—3,5 миллион сўм. Ундан юқори олувчилар ҳам бор. Бу борада уларнинг тоифаси ҳам рол ўйнайди. Бир жойда кўп йилдан бери хизмат қилаётганларнинг маошини 4 миллион сўмгача олиб чиқдик», — деган эди у.

Аввалроқ ушбу репортажда Республика Транспорт прокуратураси Тошкент метрополитенида ўрганиш ишларини олиб боргани, соҳада кўплаб қонун бузилиши ҳолатлари содир этилгани аниқлангани маълум қилинганди. Хусусан, 2021 йилнинг май—июнь ойларида Тошкент метрополитени УКда ўтказилган ўрганишлар натижасида жами 650 та инсон омили билан боғлиқ камчилик топилган.

Шунингдек, Тошкент ҳалқа йўли ерости метрополитенида олиб борилган қурилиш ишларида 899 миллион сўм талон-торож қилинган ва ушбу ҳолатлар юзасидан жиноий иш қўзғатилган.