Ўзбекистоннинг умумий ташқи қарзи ҳажми 1 апрель ҳолатига кўра, 34,2 миллиард долларни ташкил қилиб, 2021 йилнинг бошига нисбатан 1 фоизга ёки 310,6 миллион долларга ошган. Бу ҳақда Марказий банкнинг 2021 йилнинг биринчи чораги бўйича ҳисоботида қайд этилган.
Хусусан, давлат ташқи қарзи 21,2 миллиард долларни ташкил қилган бўлса, хусусий сектор қарздорлиги 12,9 миллиард долларга етган. Ушбу даврда Ўзбекистон 200 миллион доллар миқдордаги асосий қарз ва 67 миллион доллар миқдордаги фоиз тўловларини тўлаган.
«Умумий ташқи қарз ўсувчан тенденцияга эга бўлиб, ундаги ўзгаришлар таҳлили шуни кўрсатдики, давлат ташқи қарзи ўсиши COVID-19 пандемияси оқибатида юзага келган инқирознинг ижтимоий-иқтисодий таъсирини юмшатиш ҳамда ҳудудлар ва иқтисодиёт тармоқларини ривожлантириш бўйича давлат дастурларини молиялаштириш учун янги қарзларнинг жалб қилиниши билан изоҳланса, хусусий секторда эса асосан тижорат банклари ҳисобига кузатилмоқда», — дейилади ҳисоботда.
Қайд этилишича, ҳисобот даврида ташқи қарз қолдиғининг деярли ўзгаришсиз қолиши янги қарзларни жалб қилиш ва мавжуд қарзларни сўндириш даражаси мутаносиб бўлганлиги билан изоҳланади.
Эслатиб ўтамиз, Шавкат Мирзиёев 12 май куни ўтказилган видеоселектор йиғилишида мамлакатнинг ташқи қарзи масаласига тўхталиб ўтганди. «Ҳамма ташқи қарзимиз ўсиб бораётганини айтмоқда. Агар биз чет элдан кредит олмаганимизда, иқтисодиётимизни шу даражага кўтара олармидик? Биз ички ва ташқи пулларни ижтимоий-иқтисодий ҳаётни ўзгартириш учун сарфлаяпмиз...», — деган эди Президент.
Молия вазири Тимур Ишметов 28 май куни Олий Мажлис Сенатининг ялпи мажлисида 2020 йилда Ўзбекистон ташқи қарзи нималарга сарфлангани ҳақида маълумот берганди.
Изоҳ (0)