Бугун, 29 июнь куни маданият вазири Озодбек Назарбеков Ўзбек миллий академик драма театри актёрлари билан бирга Тўти Юсупованинг ҳолидан хабар олгани актриса хонадонига ташриф буюрди.
«Бугун Ўзбекистон халқ артисти, Ўзбек миллий академик драма театри онахон актрисаси Тўтихоним Юсуповани йўқладик.
Ҳамиша эл ардоғида бўлган Тўти ая билан суҳбатлашдик. Устоз санъаткор ҳақида ижтимоий тармоқларда тарқалган миш-мишлар асоссиз, севимли онахон актрисамиз шогирдлари эъзозида. Устозларини ўз оналаридек парваришлаётган шогирдларининг меҳрибонлиги Тўти аянинг театрдаги бир неча йиллар давомидаги устозлик заҳматларининг самарасидир. Муборак 85 ёшни қарши олган онахон актриса билан суҳбатимиз давомида театр саҳнаси, тасвирга олиш жараёнларидаги қизиқ воқеаларни тингладик.
Таъкидлаш керакки, театр саҳнасида 65 йил давомида турли образдаги бетакрор сиймоларни жонлантирган актриса бир неча кинофильмлар, телесериалларда ҳам ўз ижодий «муҳри»ни қўя олган саноқли санъаткорлардан биридир.
Сир эмаски, болалигимизда экран қаршисидан қимирламай томоша қилганимиз «Келинлар қўзғолони» спектаклидаги Сотти образи бугунги авлод томонидан ҳам севиб кўрилади.
Биргина, «Абдуллажон» кинофильмдаги образи ҳам Тўти Юсупова сиймосида ўзбек аёлини дунёга танитди.
Бу каби мисолларни юзлаб келтиришимиз мумкин. Онахон санъаткоримиз билан кечган самимий суҳбатимиз тугашини истамасакда, вақт ўз ҳукмини айтди.
Тўти аяга соғлик-омонлик, яна бир неча йиллар, эл ардоғида бўлиб юришини тилаб хайрлашдик», — деб ёзади Озодбек Назарбеков.
Эслатиб ўтамиз, 27 июнь куни ижтимоий тармоқларда Ўзбекистон халқ артисти Тўти Юсупова 85 ёшида вафот этганлиги ҳақидаги хабар тарқалиб, кейинчалик бу маълумот ёлғон эканлиги маълум қилинганди.
Изоҳ (0)