Тожикистоннинг Хатлон вилояти Панж тумани билан чегарада жойлашган Афғонистоннинг Қундуз вилоятидаги Имом Соҳиб тумани «Толибон» томонидан эгаллаб олинди. Бу ҳақда Афғонистоннинг Қундуздаги журналисти Ажмал Кокарга таяниб, Asia-Plus хабар берди.
Журналистнинг сўзларига кўра, «Толибон» туман ҳудудини эгаллаб олган ва эндиликда Қундуз шаҳрини қамал қила бошлаган.
«Шаҳарга кираверишдаги дарвоза аллақачон толиблар қўлида, шаҳарнинг ўзи қамалда. Шаҳарда вазият кескинлашиб бормоқда», — деди Кокар.
Шунингдек, у ҳозирча кўрилган зарарлар ҳақида хабар берилмаганини айтди. «Ҳеч қандай йўқотиш бўлмаслиги мумкин, чунки ҳукумат қўшинлари орқага чекинмоқда», — деди у.
Ажмал Кокарнинг айтишича, «Толибон» Имом Соҳиб туманини қўлга олиш орқали Тожикистон билан чегарадаги посёлка ва дарё порти бўлган Шерхон Бандарга яқинлашган.
Афғонистонда сўнгги бир неча ой ичида кўплаб ҳудудлар «Толибон» қўлига ўтди. Биргина сўнгги икки-уч кун ичида бу мамлакатда ҳукумат кучлари 15 та туманни тарк этишга мажбур бўлди.
Asia-Plus хабарига кўра, Тоҳор вилоятининг Тожикистон билан чегарадош 8 та тумани ҳам аллақачон «Толибон» томонидан эгалланган.
Изоҳ (0)