Ўзбекистонда кўчма гўзаллик салонларини ишлаб чиқариш йўлга қўйилди

Ўзбекистонда контейнерлар асосида кўчма гўзаллик салонларини ишлаб чиқариш йўлга қўйилди, деб хабар берди «Podrobno.uz».

Қайд этилишича, барча зарур мебеллар билан жиҳозланган 50 та шундай контейнер чекка қишлоқларга йўл олди. Ишлаб чиқарувчиларнинг фикрига кўра, ҳар бир салон етти сартарош аёлга мўлжалланган.

Ушбу кўчма гўзаллик салонларида «аёллар дафтари»га киритилган ва касбга ўқитилган аёллар иш билан таъминланади.

Ҳозиргача учта ана шундай контейнер Тошкент вилояти маҳаллаларига тажриба тариқасида етказиб берилди.

Лойиҳа Ўзбекистон касаба уюшмалари федерацияси томонидан амалга оширилмоқда.

Аввалроқ Бухоро вилояти ҳокими Ботир Зарипов вилоятда 1088 та контейнерга талаб борлиги ҳақида гапирган эди.