Тошкентдаги метро бекатларининг биридан шубҳали буюм топилди. Йўловчилар поезддан тушириб юборилиб, таркиб текшириш пунктига юборилган

«Ўзбекистон темир йўллари» АЖ ижтимоий тармоқларда тарқалган Тошкент метрополитенининг «Космонавтлар» бекатида поезддан йўловчилар тушириб юборилгани тасвирланган видео юзасидан маълумот берди.

Маълум қилинишича, 11 июнь куни соат 11:50 да 38-йўналишда ҳаракатланаётган поезднинг 3-вагонида шубҳали нарса қолдириб кетилган ва бу ҳақда поезд машинистига хабар берилган. Ички ишлар вазирлиги ва Тошкент метрополитени ўртасидаги ўзаро келишилган йўриқномага кўра, йўловчилар хавфсизлигини таъминлаш мақсадида улар «Космонавтлар» бекатида поезддан туширилган.

Қолдириб кетилган қаровсиз буюмни текшириш учун поезд йўловчиларсиз электродепода жойлашган махсус текшириш пунктига юборилган. Барча йўналишларда поездлар жадвал асосида ҳаракатланишни давом этган.

«Шу сабабли, ҳурматли ҳамшаҳарлар, бу каби видеолавҳаларни тасвирга олиб, нотўғри изоҳлар билан ижтимоий тармоқларда жойлаштиришдан аввал метрополитен ходимларидан сўраб, аниқлик киритиб олишингиз тавсия этилади», — дейилади муносабатда.

Шу билан бирга, йўловчиларни ташиш билан боғлиқ фаолият юритувчи метрополитен корхонасини била туриб ижтимоий тармоқлар орқали обрўсизлантириш мақсадида асосланмаган ёлғон хабарлар, фото ва видеолавҳалар, уйдирмаларни тарқатиш, шунингдек, нашр қилиш ёки бошқа усулда кўпайтирилган тарзда телекоммуникация тармоқларида ёки интернет тармоғида жойлаштириш орқали ҳамда ғаразгўйлик ёки бошқа паст ниятларда туҳмат қилиш билан боғлиқ қонунбузарликни қасддан содир қилган шахслар қонунчиликда белгиланган жавобгарликка тортилиши эслатиб ўтилган.

Сўнгги вақтларда Тошкент метрополитени билан боғлиқ шу каби воқеалар тез-тез юз бермоқда. Хусусан, 13 май куни «Амир Темур хиёбони» бекатида барча йўловчилар тушириб юборилганди. 7 май куни соат 21:10 дан 22:00 гача Тошкент метрополитени Ҳалқа йўлининг 7-бекатида электр энергияси ўчиб қолганди.

9 апрель куни ижтимоий тармоқларда поезднинг очиқ эшиклар билан ҳаракати туширилган видео тарқалди. Шу билан бирга, метрополитендаги ерости ва ерусти поезд ҳаракатларининг бир нечта бошқа видеолари ҳам ижтимоий тармоқларда кўп бора муҳокама қилинди. 28 апрель куни эса туннелда тўхтаб қолган поезд ҳақидаги видео тарқалди, унда йўловчилар рельслар орқали ҳаракатланиб, бекатга етиб олгани тасвирланган.

18 март куни эса «Олмазор» (Чилонзор йўли) ва «Бекат-1» (Сергели йўли) орасидаги туннелда икки поезд тўқнашганди.