Фарғонада бўлиб ўтган «Оналарга эҳтиром» фестивали — суратларда

Фарғонада Ўзбекистонда илк марта «Оналарга эҳтиром» фестивали ўтказилди. Бу ҳақда «Дарё» мухбири Азизжон Эрматов хабар берди.

Марғилон шаҳридаги «Ижодкорлар боғи»да бўлиб ўтган фестиваль ғолибларини тантанали тақдирлаш маросимида вилоятнинг барча шаҳар ва туманларидан келган 1 минг 600 нафардан зиёд мўътабар онахонлар ҳамда аёллар иштирок этган.

Қайд этилишича, тадбирда Фарғона вилояти ҳокими Хайрулла Бозоров, маданият вазири Озодбек Назарбеков, маҳалла ва оилани қўллаб-қувватлаш вазирининг биринчи ўринбосари Гулнора Маъруфова қатнашиб, фарғоналик оналарга эҳтиром кўрсатган.

Маълум қилинишича, вилоятдаги шаҳар-туманлар вакиллари томонидан ҳар бир ҳудуднинг ўзига хос жиҳатлари, оналарга бўлган ҳурмат-эҳтиромни ифода этган турли кўргазмалар, бадиий чиқишлар ва маданий-маърифий тадбирлар намойиш этилган.

Фестивальда миллий ва замонавий либослар кўргазмаси, «Оналарга бағишланган энг яхши қўшиқ», «Оналарга бағишланган энг яхши видеоролик ва дил изҳорлари» ҳамда «Алла» танловлари, таниқли санъаткорлар ва фольклор жамоалари иштирокида концерт дастурлари ўтказилган.

Фестиваль доирасида «Энг маърифатли фарзанд онаси», «Энг яхши ҳарбийлар сулоласи онаси», «Энг яхши шифокорлар сулоласи онаси», «Энг яхши раҳбар она», «Энг яхши олима она» каби 25 та номинация бўйича ғолиб бўлган оналарга махсус мукофотлар топширилган.

Таъкидланишича, бир ой давомида вилоятнинг барча шаҳар-туманларида ўтказилган фестиваль тадбирларида 10 минг нафардан зиёд фарғоналик оналарга эҳтиром кўрсатилган.