Бухорода 2021 йилнинг 28—30 май кунлари XIX «Ипак ва зираворлар» Халқаро анъанавий фестивали бўлиб ўтгани хабар берилган эди. Уч кун давом этган фестивалнинг иккинчи кунидаги тантанали юришда чавандоз ва отнинг ерга йиқилиш ҳолати «Ҳақиқий ватанпарвар ерга қуласа ҳам, байроқни қўлдан ташламади», дея талқин қилинди. «Дарё» мухбири ушбу ҳолатнинг қандай содир бўлгани билан қизиқди.
Маълум бўлишича, фестиваль жараёнлари 30 дан ортиқ лойиҳалардан иборат бўлиб, уларга 15 мингга яқин хорижлик ва маҳаллий сайёҳлар жалб қилинган. Биргина тантанали карвон юришида (марш) спортчию, фолклор дасталар, санъаткор ва ҳунармандлар, корхона-ташкилот, ўқув муассасалари ходимлари, аҳоли ва талаба ёшлардан иборат 5 мингга яқин фуқаролар қамраб олинган.
«‘Арк’ қўрғонидан ‘Лаби ҳовуз’ мажмуасигача бўлган манзилдаги карвон юришида Бухоро якка кураш спорт мактабига қарашли от спорти мактабининг еттита отидан фойдаланилган. Отларни бошқариш учун тажрибали етти нафар чавандоз бириктирилган. Карвон юришида отларнинг бири қўққисдан қаттиқ ҳурккан ва кутилмаганда сирпаниб, чавандоз билан бирга ерга йиқилган. Чавандоз отдан йиқилаётган кезда ҳам ўзини йўқотиб қўймаган ва Ўзбекистон байроғини ерга тушириб юбормаслик учун уни қўлида даст тутган.
Ижтимоий тармоқларда тарқалган ушбу сурат изоҳига қизиққан «Дарё» мухбири Бухоро якка кураш спорт мактаби директори Сарви Умаров билан телефон орқали боғланган. Сарви Умаров «Саволингизга жавоб беришим учун сизда нима асос бор?» — дея ҳолатдан хабарсизлигини, ҳатто бу ҳақда эшитмаганини айтиб, қўполлик қилган.
Шундан сўнг «Дарё» мухбири Бухоро якка кураш спорт мактабига қарашли от спорти мактаби чавандози Санжар Раҳимов (суратдаги чавандоз) билан суҳбатда бўлган.
«Биласиз, тантанали юриш жуда кўтаринки кайфиятда, карнай-сурнай, доираю ноғоралар садоси остида бошланади. Минг-минглаб одамлар жалб этилади. Энг олд қаторда эса биз, чавандозлар юрамиз. Бизни эса олдинда жуда кўплаб телевидение операторлари ҳамда сураткашлар қаршилаб боради. Икки ён томон эса аҳоли билан гавжум, ‘қий-чув’, шодон қийқириқлар. Шундай кезда менга бириктирилган от кутилмаганда ҳуркиб, кишнаб, тақали туёғи сирпаниб кетди ва ағдарилди. Ўнг қўлимда эса Ўзбекистон байроғи. Бу ҳолат шу қадар қисқа фурсатда тез содир бўлдики, отга қўшилиб йиқилаётганимни билиб, шунда ҳам ўнг қўлимдаги байроқни ерга тушириб юбормаслик учун чаққонлик билан чап қўл тирсагимни ерга тираб олдим», — дейди чавандоз Санжар Раҳимов.
Чавандознинг айтишича, айни шу ҳолатда одамлар тезкорлик билан кўмакка эмас, суратга олиш учун шайланган. Бир неча дақиқа ичида ўзи ва бошқарувидаги от аҳволини ўнглаган чавандоз карвонга қўшилиб, юришда давом этган.
«От спорти мактаби тантанали карвон юриши мўлжалланган ‘Арк’ қўрғонидан етти километр олисда. Отларнинг туёқларига ҳимоя воситаси бўлган тақалар урилгани учун уларни баҳолиқудрат асфальт йўлларнинг чети, яъни қум-тупроқли жойдан юргиздик. Асфальтли йўлда отларнинг тақали туёқларда юриши ҳам анча-мунча мушкул. Бироқ шундай йўлларда ҳам отлар қўққисдан ҳуркмаса ёки чўчимаса, бундай ҳолатлар юзага келмайди», — дейди чавандоз.
Чавандоз мазкур воқеага нисбатан ижтимоий тармоқлар орқали билдирилган масхаромуз ва кинояли муносабатлардан ранжиганини ҳам қўшимча қилди.
«Ҳатто, ‘чавандоз спиртли ичимлик истеъмол қилиб, маст ҳолатда бўлган’, деган ҳақоратомуз гаплар ҳам бўлди. Бу ҳаммасидан ўтиб тушди. Аллоҳга шукур, беш вақт намоздаман. 1985 йилдан буён от спорти билан шуғулланаман, спорт устасиман, тажрибам етарли. Бироқ айни ўша дамда ерга ағдарилиб тушаётганимни онгли равишда ҳис қила туриб, қўлимдаги байроқнинг оёқости бўлиши ва ерга тушиб кетишини истамадим, холос. Шукурки, отга ҳам, ўзимга ҳам ҳеч қандай зиён етган эмас», — дейди чавандоз.
Изоҳ (0)