Вьетнам соғлиқни сақлаш вазири Нгуен Тхан Лонг мамлакатда Ҳиндистон ҳамда Буюк Британия штаммларининг гибридлашган янги нусхаси аниқланганини маълум қилди. Бу ҳақда Channel NewsAsia хабар тарқатган.
Вьетнам ССВнинг қайд этишича, коронавируснинг янги нусхаси ниҳоятда тез юқади ва нисбатан хавфлироқ. Тахминларга кўра, мазкур штаммнинг пайдо бўлиши Вьетнамда коронавирусга чалинганлар сонининг кескин ошишига олиб келган, мамлакатда «британча» штамм аниқлангунига қадар аҳолини оммавий равишда тестлаш ва кескин карантин чоралари сабабли COVID-19 билан хасталаниш даражаси нисбатан паст эди.
Жонс Ҳопкинс университети тақдим қилган статистик маълумотлар бўйича Вьетнамда пандемия даври давомида 6,5 мингдан зиёд одам коронавирусга чалинган ва 47 нафар бемор касаллик асоратларидан вафот этган. Мамлакатда аҳолини коронавирусга қарши эмлаш ишлари бошланган ва 1 миллион доза вакцинадан фойдаланилган.
Буюк Британия штамми 2020 йил охирида пайдо бўлган. Мутахассислар «британча» штамм билан касалланган беморларда касалликнинг оғир босқичларигача бормаслиги, бироқ касалликнинг бошқаларга юқиш эҳтимоли юқори эканини билдирган.
Ҳиндистон штамми эса мамлакатда апрелдан буён COVID-19 инқирозини вужудга келтирган, касаллик асоратлари оқибатида вафот этганлар сони ҳам кескин ошган. Май ойида Ҳиндистонда касалликка чалиниш кўрсаткичи бир суткада 400 мингтагача етган ва бу дунё бўйича рекорд кўрсаткич. Касалхоналар юкламага дош бера олмаяпти, вафот этган беморларнинг жасади гулханда ёқилиб, дарёга оқизилмоқда. Апрелдан бери нисбатан камроқ касалланиш 28 майда кузатилди ва шу куни Ҳиндистонда бир сутка ичида COVID-19 юқтириб олиш бўйича 186 364 та янги ҳолат қайд этилди.
Изоҳ (0)