«iPhone сизларни қулга айлантиради». Павел Дуров Apple’ни танқид қилди

Telegram асосчиси Павел Дуров Apple Хитойдаги фойдаланувчиларни кенг кўламда кузатишда иштирок этаётгани келтирилган The New York Times’да мақолага изоҳ берди, деб ёзади IXBT.

Дуров бу ҳайратланарли эмаслигини, чунки йирик технологик компаниялар кўпинча эркинликни эмас, балки фойдани маъқул кўришини маълум қилган. Шунингдек, Telegram асосчиси фақат зарурат туғилганида iPhone’дан фойдаланишини таъкидлаб ўтган.

«Apple ўзларининг экотизимига блокланган, эскирган қурилмаларини мижозларга қиммат нархларда сотишга асосланган бизнес-моделини жуда самарали амалга оширмоқда. Ҳар сафар дастуримизнинг iOS учун версиясини синаш учун iPhone’дан фойдаланганимда худди ўзимни ўрта асрларга тушиб қолгандек ҳис қиламан. 60 герцли янгиланиш частотасига эга iPhone дисплейлари 120 герцли экранларга эга замонавий Android телефонлар билан рақобатлаша олмайди», — дейди Дуров.

Telegram асосчисининг қўшимча қилишича, iPhone фойдаланувчини Apple’нинг рақамли қулига айлантиради, чунки у Apple рухсат бермаган дастурлардан фойдалана олмайди. Бундан ташқари, захира маълумотлар нусхасини яратиш учун фақатгина iCloud’дан фойдаланишга тўғри келади.

«Apple ёрдамида iPhone’дан фойдаланадиган фуқароларининг дастурлари ва маълумотлари устидан тўлиқ назоратга эга Хитой Коммунистик партияси компаниянинг тоталитар ёндашувини қадрлаши ажабланарли эмас», — дейди у.

Аввалроқ Павел Дуров фойдаланувчиларни Android фойдасига iOS’дан воз кечишга чақирганди.