Хитойда қувватлантиргичда турган AirPods Pro ёниб кетди (фото)

Twitter’да FrontTron ники остидаги фойдаланувчи Хитойда AirPods Pro эгаларидан бири билан содир бўлган кўнгилсиз ҳодиса тасвирланган сурат билан бўлишди, деб хабар беради Hi-Tech.Mail.ru.

Эълон қилинган суратлардан кўриш мумкинки, Apple наушнигининг оригинал футляри ҳам ичидан, ҳам ташқи томонидан эриб кетган. Маълум қилинишича, куйиш наушниклар футляр ичида бўлганида юз берган — қурилманинг иккисига ҳам шикаст етган, улардан бири бутунлай яроқсиз ҳолга келиб қолган.

Ижтимоий тармоқ фойдаланувчиси одамлар содир бўлган ҳолат кўламини яхшироқ тасаввур қилишлари учун кўпроқ суратларни жойлаган:

Маълумотларга кўра, кўнгилсиз ҳодиса наушниклар қувватлантиргичда турганида содир бўлган. Тўсатдан улардан тутун чиқа бошлаган. Наушник эгаси ўз қурилмасини Baseus UM2 PD адаптери ёрдамида қувватлантиришга уринган ва у AirPods Pro стандарт Power Delivery’ни қўллаб-қувватламаслигини унутиб қўйган ёки билмаган.

AirPods Pro’ни 5 ваттдан юқори бўлган исталган адаптерга улаш хавфли. Агарда шу каби ҳолатда гарнитурага бирор нима бўлса, уларни кафолат орқали таъмирлашнинг имкони бўлмайди.

Аввалроқ Apple AirPods 3 наушникларининг сурати тақдимотдан олдин интернетда тарқалиб кетгани, америкалик эркак уйқусида AirPods’ни ютиб юборгани тўғрисида хабар берилганди.