Буюк Британияда мамлакат бош вазири Борис Жонсоннинг 2019 йилнинг декабрь ойи охиридан 2020 йилнинг январь ойи бошигача Кариб денгизининг Мюстик оролида ўтказган таътилининг молиялаштириш манбалари текширилмоқда. Буюк Британия парламентининг Меъёрлар бўйича комиссари Кэтрин Стоун тегишли тергов бошлангани ҳақидаги маълумотни тасдиқлади, деб ёзмоқда «Korrespondent.net».
Ҳукумат раҳбарига қарши текширув бошлангани ҳақида матбуотда 2020 йилдаёқ хабарлар пайдо бўлган эди, лекин улар фақат 2021 йилнинг 10 май куни расмий равишда қонун чиқарувчи органнинг сайтида тасдиқланди.
2019 йил 12 декабрда бўлиб ўтган парламент сайловларида ғалаба қозонганидан кўп ўтмай, Янги йил арафасида Жонсон ва унинг қаллиғи Кэрри Симондснинг 15 минг фунт стерлингга (20 минг доллар) баҳоланган саёҳати билан боғлиқ можаро таътил харажатлари қандай тўлангани масаласидаги ноаниқлик туфайли юзага келган. Бош вазир оролга саёҳат харажатларини ҳукмрон Консерватив партиянинг донори, Буюк Британиядаги Европанинг энг йирик уяли телефон сотувчиси бўлган Carphone Warehouse компанияси кенгашининг собиқ муовини Дэвид Росс тўлаганини маълум қилган. Кейинчалик ўз навбатида Росс бу маълумотларни рад этиб, Жонсон ва унинг ҳамроҳи учун таътил харажатларини тўламагани, уларнинг фақатгина оролда яшашини ташкиллаштиришда ёрдам берганини таъкидлаган.
Ушбу тергов мухолифатдаги Лейбористлар партияси депутатларининг мурожаатидан сўнг уюштирилган, улар депутатларнинг Ахлоқ кодекси парламент аъзоларидан хайрия қилган шахс ёки ташкилот номини айтиши талаб этилишини таъкидлаб ўтган. Ушбу тартиб Буюк Британияда амалдаги қонунларга биноан парламент аъзоси бўлишга мажбур бўлган бош вазирга ҳам тегишли ҳисобланади.
Агар Кэтрин Стоун Жонсон кодекс қоидаларини бузган, деган хулосага келса, у ҳолда унинг ёзма равишда узр сўрашини талаб қилишга ҳақли бўлади. Шунингдек, Стоун бош вазирнинг қоидабузарлигини жуда жиддий деб ҳисобласа, ишни тўғридан-тўғри Жонсонни иш ҳақининг бир қисмидан маҳрум қилиш каби қаттиқроқ жазога ҳукм қилиши мумкин бўлган парламент меъёрлари қўмитасига юборади. Буюк Британиядаги ОАВнинг ёзишича, бундай чоранинг қўлланиши ҳукумат раҳбарининг обрўсига жиддий зарар етказиши мумкин.
Маълумот учун, таътил можароси Жонсонга қарши олиб борилаётган иккинчи тергов бўлиб, 28 апрель куни Буюк Британиянинг Сайлов комиссияси бош вазир қароргоҳи таъмирланишининг молиялаштирилиши билан боғлиқ ҳолатлар бўйича текширув бошлаганини маълум қилди.
Аввалроқ Буюк Британия бош вазири Борис Жонсон Оксфордшир графлигида жойлашган коттежини ижарага бермоқчи эканини маълум қилди. Коттежнинг умумий майдони ёнма-ён қурилган бино билан биргаликда 288,5 квадрат метрни ташкил этади, уй мебелларсиз ижарага берилади. Уй ҳайвонларини хонадонда парвариш қилишга ҳам уй эгалари билан келишган ҳолда рухсат олинади. Эълон бўйича уйнинг ҳафталик ижараси — 981 фунт стерлинг (ойига 4,25 минг фунт).
2019 йилда Жонсон ўзи ва рафиқасига тегишли XIX асрга оид Лондондаги таунхаусни сотиб юборганди. Буюк Британия бош вазири мазкур объект сотувидан 3,7 миллион АҚШ доллари миқдорида даромад олган.
Изоҳ (0)