Қозоғистонда ҳар йили анъанавий тарзда ўтказиладиган Ғалаба куни тантаналари мураккаб эпидемиологик вазият туфайли 2021 йилда нишонланмайдиган бўлди. Бу ҳақда «Интерфакс» хабар берди.
Давлат раҳбарининг матбуот котиби Берик Уали ўзининг Facebook саҳифасида ёзишича, мамлакат президенти ватандошларига байрам табриги билан мурожаат қилади.
Унинг қўшимча қилишича, уруш фахрийларига моддий ёрдам кўрсатилади.
Аввалроқ республика Мудофаа вазирлиги қошидаги «Интерфакс-Казахстан» агентлиги Қозоғистоннинг уруш ва меҳнат фахрийларини Ғалаба куни билан табриклаш минтақалардаги санитар-эпидемиологик вазиятни ҳисобга олган ҳолда амалга оширилишини маълум қилди. Байрам муносабати билан ўтказиладиган тадбирларнинг аксарияти онлайн тарзда ташкил этилиши режалаштирилган.
Бундан ташқари, аввалроқ мамлакатдаги эпидемиологик вазият сабабли 7 май куни нишонланадиган Ватан ҳимоячилари куни ва Ғалаба кунига бағишлаб ҳарбий парад ўтказиш режалаштирилмаётгани ҳақида хабар берилганди. 2020 йилда Ғалаба кунининг 75 йиллигига бағишланган ҳарбий парад коронавирус тарқалиш хавфи туфайли бекор қилинган эди.
Қозоғистонда ўтган бир кун давомида коронавирус билан касалланиш бўйича ПЗР-тести билан тасдиқланган 2587 та янги ҳолат рўйхатга олинган.
Аввалроқ Қозоғистон президенти Қосим-Жўмарт Тўқаев 9 май куни Россия пойтахти Москвада бўлиб ўтадиган Ғалаба парадида иштирок этмасликни режалаштираётгани маълум бўлди.
Тожикистон раҳбари Эмомали Раҳмоннинг эса Иккинчи жаҳон урушидаги ғалабанинг 76 йиллигига бағишланган парад меҳмони сифатида Москвага ташриф буюриши айтилди.
Параддан олдин Эмомали Раҳмон 8 май куни Россия президенти Владимир Путин билан музокаралар олиб бориши кутилмоқда. Россия президентининг матбуот котиби Дмитрий Песков давлат раҳбарлари Тожикистон ва Қирғизистон чегарасидаги вазиятни муҳокама қилишини айтди.
Мавзуга доир:
Изоҳ (0)