Қирғизистон раҳбари Садир Жапаров давлат ва ҳукумат таркибини президент маъмуриятига қайта ўзгартириш бўйича фармонни имзолади. Бу ҳақда президент матбуот хизматига таяниб, «РИА Новости» хабар берди.
«Давлат раҳбари Садир Жапаров 2021 йил 11 апрелда бўлиб ўтган референдумда (оммавий овоз бериш) қабул қилинган Қирғизистон республикаси конституциясига мувофиқ, аввалги президент ва ҳукумат идоралари асосида президент маъмуриятини тузишни кўзда тутувчи фармонни имзолади», — деди президент матбуот хизматининг вакили.
Унинг сўзларига кўра, президент аппаратининг собиқ раҳбари Суюнбек Касмамбетов маъмурият раҳбари этиб тайинланди.
5 май куни Қирғизистон президенти Садир Жапаров апрель ойидаги референдум натижалари бўйича қабул қилинган тузатишларни инобатга олган ҳолда мамлакат конституциясининг янги таҳририни имзолади. Янги конституция Халқ қурултойи (кенгаши) институтини ижтимоий ривожланиш йўналишлари бўйича тавсиялар берадиган консултатив, кузатув йиғилиши сифатида жорий этди. Шунингдек, президент ва ҳукумат институтлари қайта шакллантирилди. Бундан буён Вазирлар Маҳкамасининг тузилмаси ва унинг фаолияти бўйича жавобгарликни президент ўз зиммасига олади, президент маъмуриятининг раҳбари эса Вазирлар Маҳкамасини бошқаради. Ҳужжат парламент аъзолари сонини 120 тадан 90 тагача камайтиришни назарда тутади.
Садир Жапаров мамлакат халқига мурожаат қилар экан, Қирғизистон иқтисодиёти сўнгги йиллардаги энг жиддий инқирозга юз тутаётганини маълум қилди.
Аслида, таклиф этилаётган янгиликлар бошқарувнинг парламент-президентлик шаклидан президентлик шаклига ўтишини англатади. 2021 йилнинг 10 январь куни бўлиб ўтган референдумда мамлакатнинг 80 фоизга яқин аҳолиси шу шаклни ёқлаб овоз берган эди.
Изоҳ (0)