Қозоғистоннинг Ғарбий Қозоғистон вилояти Уралск шаҳрида жойлашган маданият ва истироҳат боғидаги аттракционда саккиз нафар бола жароҳатланди, деб ёзмоқда Tengrinews.
Аттракционнинг кескин тўхташи натижасида беш ёшдан ўн ёшгача бўлган саккиз нафар бола йиқилиб тушди. Ижтимоий тармоқларда ҳодисанинг видеоси кенг тарқалмоқда.
Гувоҳларнинг сўзларига кўра, ишлаётган пайтида карусел кескин тўхтаган. Ускуна айланмай қолган ва болалар аттракциондан ерга йиқилган.
«Барчаси кўз олдимда содир бўлди. Бу қўрқинчли фильмдан бир саҳна эди. Бечора болалар. Дарҳол етиб келиб арғимчоқни тута бошлаган йигитларга катта раҳмат», — деди Уралск фуқароларидан бири.
Вилоят соғлиқни сақлаш бошқармасининг матбуот хизмати тез тиббий ёрдам бўлимига истироҳат боғидаги ҳодиса тўғрисида соат 19:36 да қўнғироқ келиб тушганини маълум қилди. Жароҳатланганлар вилоят болалар шифохонасига етказилди.
Кейинроқ Уралск полиция департаменти ушбу ҳодиса бўйича Жиноят кодексининг 306-модда 2-қисми билан («Хавфсизлик талабларига жавоб бермайдиган товарларни ишлаб чиқариш ёки сотиш, ишларни бажариш ёки хизматлар кўрсатиш») судгача бўлган тергов-суриштирув ишлари бошлангани ҳақида хабар берди.
Маълумот учун, икки йил олдин Уралск истироҳат боғидаги «Чархпалак» аттракциони тўхтаб қолган эди. Аттракционда қолиб кетган одамларни қутқарувчилар ёрдамида кўп метрли баландликдан олиб тушишга тўғри келган. Ҳодисадан кейин аттракцион демонтаж қилинган.
Аввалроқ Мисрда йўловчи поезди рельсдан чиқиб кетди, 11 киши ҳалок бўлиб, 100 га яқин одам жароҳатлангани ҳақида хабар берилди. Темир йўл маъмурияти баёнотига кўра, Қалюбия вилоятининг Бенха шаҳрида поезднинг тўртта вагони рельсдан чиқиб кетган.
26 март куни Миср жанубидаги Сохаг ҳудудида иккита йўловчи поездининг ўзаро тўқнашиши оқибатида камида 32 нафар одам ҳалок бўлиб, яна 91 киши турли даражадаги тан жароҳатлари олган эди. Поездларнинг у қадар катта тезликда ҳаракатланмагани бири бошқасининг ортидан юргани маълум қилинган. Тўқнашувдан кейин иккита вагонга жиддий талафот етган, уларнинг бири ағдарилиб қолган.
Изоҳ (0)