Ўзбекистондаги «тез ёрдам»га амалга оширилган чақириқларнинг қарийб 1900 таси асоссиз бўлиб чиққан
2021 йилнинг биринчи чорагида Ўзбекистон тез тиббий ёрдам хизматига 2,7 миллиондан ортиқ чақириқ келиб тушган бўлиб, уларнинг 1874 таси асоссиз чақириқлардан иборат. Бу ҳақда Соғлиқни сақлаш вазирлиги матбуот хизмати хабар берди.
Асоссиз чақириқлар қаторидан манзил нотўғри кўрсатилгани, «103» бригадасига уй эшигини очишмагани, бемор чақириқ манзили кўрсатилган жойда эмаслиги ёки тез тиббий ёрдамга мурожаат қилинмагани каби ҳолатлар кўрсатилган.
Асоссиз чақириқлар бўйича энг юқори кўрсаткич Сурхондарё вилоятида қайд этилган — 497 та. Бундан ташқари, бу каби ҳолатлар Фарғона (387), Тошкент (249) ва Қашқадарё (204) вилоятларида ҳам кузатилган.
Таъкидланишича, 2020 йилнинг айни шу даврига келиб, фуқаролар томонидан тез тиббий ёрдам хизматига 3 миллиондан зиёд чақириқ келиб тушга. Соғлиқни сақлаш вазирлиги буни 2020 йилдаги пандемия шароити билан боғламоқда. 2020 йилнинг айни шу даврида 3 мингга яқин асоссиз чақириқ қайд этилган. 2019 йилда эса ССВ мурожаатларнинг «30 фоизини асоссиз» деб атаганди.
