Россия Ички ишлар вазирлиги ноқонуний муҳожирларга мамлакатда вақтинча бўлиш муддатини узайтириш учун вазирлик органларига мурожаат қилишини қатъий тавсия қилди. Вазирлик мурожаатида муҳожирларга чеклов чоралари қўлланилмаслиги таъкидланди, деб ёзмоқда «Коммерсантъ».
«Президент фармонига мувофиқ, бундай ҳолатда белгиланган санкцияларни қўлламасдан ҳуқуқий вазиятни тартибга солиш имконияти берилди. Россияда бўлиш учун қонуний асоси бўлмаган шахсларга ўзи жойлашган ҳудудлардаги Россия Ички ишлар вазирлигининг ҳудудий органларига мурожаат қилиши тавсия этилади», — дейилади вазирлик сайтида.
Вазирлик давлат раҳбарининг 2020 йил 18 апрелдаги фармонини илова қилган. Коронавирус тарқалиши муносабати билан Владимир Путин имзоланган ушбу фармонга кўра, 2020 йилнинг 15 мартигача Россия ҳудудида бўлишига қонунан рухсат берилган меҳнат муҳожирлари мамлакатда 15 июнгача қолиши мумкинлиги белгиланган эди. Амал қилиш муддати бир неча марта узайтирилди, ҳозир ноқонуний муҳожирларнинг 2021 йилнинг 15 июнигача мамлакатда бўлишига рухсат берилган.
Ўтган ҳафтада ички ишлар вазири ўринбосари Александр Горовой МДҲ давлатлари вакилларига мурожаат қилди ва «уларнинг кўплаб фуқаролари мамлакат ҳудудида ноқонуний бўлиб тургани»ни айтди. У бошқа мамлакатлар расмийларини ўз фуқаролари билан тарғибот ишларини олиб боришга чақирди. Горовой ноқонуний мигрантлардан 15 июнга қадар мамлакатни тарк этишни талаб қилди.
Аввалроқ Россияда йирик лойиҳаларни амалга ошириш учун меҳнат муҳожирлари етишмаётгани, Москвага ишлаш учун борган 500 дан ортиқ ўзбекистонлик 2 ойдан буён карантиндалиги сабаб норозилик билдиргани тўғрисида хабар берилганди.
Изоҳ (0)