Дҳармендра, Шармила Тагор ва ислом динини қабул қилган бошқа Болливуд юлдузлари (фото)

Ҳинд миллатига мансуб айрим актёр ва актрисалар ислом динини қабул қилган. Қуйида улар ҳақида батафсил маълумотга эга бўлиш мумкин.

Дҳармендра

Асл исми Дҳарам Сингх Деол бўлган Болливуднинг энг таниқли актёрларидан бири Дҳармендра 44 ёшида Ҳема Малинига уйланганидан сўнг ислом динини қабул қилган. Шунингдек, актёр аллақачон турмуш қурган бўлиб, биринчи рафиқаси унинг бошқага уйланиши учун ажрашишни истамаган. Дҳармендра шундан сўнг ислом динига ўтган ва Ҳемага уйланиб, икки оилани ҳам бирдек таъминлаб келган. Актёрнинг бундай йўл тутиши жамоатчилик томонидан танқидларга сабаб бўлган, аммо у Ҳемага уйланиш учун шундай қилишига тўғри келган.

Шармила Тагор

Ҳукуматнинг «Падма Шри» мукофоти совриндори Шармила Тагор ҳам ислом динини қабул қилган актриса. У крикет ўйинчиси Мансур Али Хонни севиб қолган ва унга турмушга чиқишдан аввал динини ўзгартирган. Сўнгра у Ойша Бегим исмини ҳам олган. Оилада уч фарзанд дунёга келган: ўғли актёр Саиф Али Хон, дизайнер Саба Али Хон ва актриса Соҳа Али Хонлар.

Махеш Бхатт

Актриса Алия Бхаттнинг отаси – ҳинд кинорежиссёри ва продюсери Махеш Бхатт биринчи рафиқаси Киран Бхатт билан ажрашмасдан, Сона Разданга уйланиш учун ислом динига ўтган. Бироқ у ислом дини анъаналарига кўра яшамайди ва буни тан ҳам олмайди.

Амрита Сингх

Актриса Амрита Сингх сикх-мусулмонлар оиласида туғилган. 1983 йилда Амрита «Севги қудрати» фильмида илк дебютини ижро этган. Шундан сўнг яна бир қанча машҳур фильмларда иштирок этган. 1990 йилларнинг бошларида у Саиф Али Хон билан учрашган ва тўйдан аввал исломни қабул қилган. Афсуски, 13 йиллик турмушдан сўнг улар ажрашди. Саифнинг ҳозирги турмуш ўртоғи Карина Капур Хон исломни қабул қилмагани ва ҳиндуизмга содиқ қолгани қизиқ.

Аеша Такия

Болливуднинг ёқимтой ва қувноқ актрисаси Аеша Такия севгилиси Фархан Азми билан оила қуриш учун ислом динини қабул қилган. Тўй исломий тарзда нишонланиб, никоҳ ҳам ўқилган. Аеша ҳеч қачон ўз динини ўзгартирганини тан олмаса-да, оммавий ахборот воситалари бунинг аксини таъкидламоқда.

Мамта Кулкарни

Ўтган аср 90 йилларининг таниқли актрисаси Мамта Кулкарни 2013 йилда исломни қабул қилган. Унинг севгилиси Вики Госвами Саудия Арабистонидаги аэропортда ушланиб, 25 йилга озодликдан маҳрум қилинган. Аммо 2012 йилда озодликка чиқарилган. Баъзилар Мамта исломни қабул қилгани учун муддат қисқарди, деб ўйлайди. Мамта турмушга чиқиш учун ислом динига ўтган ва ҳозирда улар Кениянинг Найроби шаҳрида яшайди.