Ўзбекистон Президенти Шавкат Мирзиёев 6 апрель куни Жанубий Корея парламентининг Миллий Ассамблея спикери Пак Бён Сок бошчилигидаги делегациясини қабул қилди.
Делегация таркибида Ўзбекистонга спикердан ташқари, Жанубий Корея парламентининг давлат бошқаруви, молиявий сиёсат, саноат, савдо, энергетика, транспорт, қишлоқ хўжалиги, экология, соғлиқни сақлаш, меҳнат муносабатлари, маданият, спорт ва туризм каби устувор йўналишлар бўйича қўмиталарига аъзо 6 нафар депутат ҳам келган.
Суҳбат чоғида икки томонлама муносабатлар ва минтақавий ҳамкорликнинг долзарб масалалари кўриб чиқилди. Ўзбекистон ва Жанубий Корея ўртасидаги дўстлик ва алоҳида стратегик шериклик муносабатларини мустаҳкамлашда парламентлар муҳим ўрин тутаётгани таъкидланди.
Давлат раҳбари фаол алмашинувлар давом этаётгани, кенг кўламли Ўзбекистон–Корея ҳамкорлиги жадал ривожланиб бораётганини катта мамнуният билан қайд этди. 2021 йил бошида икки мамлакат етакчиларининг онлайн-саммити муваффақиятли ўтказилди.
Пак Бён Сок самимий қабул учун миннатдорлик билдириб, Ўзбекистон Президентига Жанубий Корея президенти Мун Чже Иннинг саломи ва эзгу тилакларини етказди.
Учрашувда глобал иқтисодий вазият мураккаб бўлиб турган бир пайтда ўзаро савдо ҳажми сақлаб қолинишига эришилаётгани таъкидланди. Кореянинг етакчи компания ва банклари иштирокида умумий қиймати 3 миллиард доллардан зиёд янги инвестиция лойиҳалари тайёрланди. Умуман, Жанубий Кореянинг мамлакатимизга инвестициялари ҳажми 7 миллиард доллардан ошди.
Ўзбекистонда коронавирус пандемиясига қарши курашда кореялик шериклар томонидан катта амалий кўмак кўрсатилгани учун миннатдорлик билдирилди.
Миллий Ассамблея Спикери ва депутатлари мамлакатлар ўртасидаги кўп қиррали ҳамкорликни кенгайтириш борасидаги фаол саъй-ҳаракатлар учун, шунингдек, Сеулнинг Корея ярим оролидаги вазиятни тинч йўл билан ҳал этиш борасидаги ҳаракатлари, Янги шимолий сиёсатни амалга ошириш доирасидаги минтақавий ташаббуслари қатъий қўллаб-қувватланаётгани учун Ўзбекистон Президентига самимий ташаккур изҳор этдилар.
«Жанубий Корея—Марказий Осиё» ҳамкорлик форуми доирасидаги яқин мулоқотни давом эттириш муҳим экани таъкидланди.
Соғлиқни сақлаш, таълим, илм-фан ва маданият, гуманитар алмашинув соҳаларидаги қўшма дастурларни амалга ошириш масалалари ҳам кўриб чиқилди.
Бундан аввал Шавкат Мирзиёев Россия саноат ва савдо вазири Денис Мантуров бошчилигидаги делегацияни ҳамда Эрон ташқи ишлар вазири Муҳаммад Жавод Зарифни қабул қилгани ҳақида хабар берилганди.
Изоҳ (0)