Ўзбекистон бош вазири Абдулла Арипов 5 апрель куни Тошкент шаҳрида бошланган «Иннопром. Ўзбекистонда катта саноат ҳафталиги» халқаро саноат кўргазмасига ташриф буюрган хорижий мамлакатлар делегациялари раҳбарларини қабул қилди, деб хабар беради ЎзА.
Учрашувда Россия саноат ва савдо вазири Денис Мантуров, Евросиё иқтисодий комиссияси саноат ва агросаноат мажмуаси бўйича вазири – коллегия аъзоси Артак Камалян, Беларусь саноат вазири Пётр Пархомчик, Қирғизистон энергетика ва саноат вазири Кубаничбек Турдубаев, Тожикистон саноат вазири Шерали Кабиров, Қозоғистон индустрия ва инфратизимни ривожлантириш вазири ўринбосари Аманияз Ержанов, Озарбайжон мудофаа саноати вазири ўринбосари Меҳман Бахишов иштирок этган.
Россия саноат ва савдо вазири Д.Мантуровга «Иннопром» саноат ҳафталигини Ўзбекистонда ўтказиш ташаббусини илгари сургани, бошқа делегациялар раҳбарларига эса кўргазма доирасидаги тадбирлардаги иштироки учун давлат раҳбари Шавкат Мирзиёевнинг самимий миннатдорлиги етказилган.
Умумий майдони 12,5 минг квадрат метрни ташкил этган кўргазма майдонида дунёнинг 20 мамлакатидан 300 дан ортиқ компаниянинг маҳсулот ва хизматлари намойиш этилмоқда. Анжуман дастурига кўра, 15 га яқин кенг қамровли тадбир, 200 дан ортиқ бизнес-учрашув ўтказилиши режалаштирилган.
Таъкидланишича, «Иннопром» доирасида имзоланадиган инвестициявий ва савдо келишувлари барча шерик мамлакатлар манфаатини ҳимоя қиладиган лойиҳаларни амалга ошириш имконини яратади.
Аввалроқ Шавкат Мирзиёев Россия саноат ва савдо вазири Денис Мантуров бошчилигидаги делегацияни қабул қилгани тўғрисида хабар берилганди.
Изоҳ (0)