Тошкент вилоятида «ГАИнинг духини синдирмоқчи» бўлган ҳайдовчи 15 суткага қамалди

Ижтимоий тармоқларда «ГАИнинг духини синдириш бўйича мастер-класс» сарлавҳаси остида видеолавҳа тарқалгани ва ҳолат юзасидан Тошкент вилояти ИИББ ТҲХБ томонидан суриштирув ҳаракатлари олиб борилаётгани тўғрисида хабар берилганди. ИИВ ЙҲХББ ахборот хизматининг маълум қилишича, ҳуқуқбузарлик содир этган ҳайдовчига нисбатан маъмурий қамоқ жазоси белгиланган.

Маълум қилинишича, 31 март куни Тошкент вилояти ИИББ ЙҲХБ ЙПХ ходими А.Абдураҳимов 4Р6 Тошкент—Чимён автомобиль йўлининг 17-километрида ҳайдовчи, 1988 йилда туғилган А.С. бошқарувидаги DAF TE 105 XF русумли юк автомобилини тўхтатган. Бунга юк машинаси светофорнинг тақиқловчи қизил чироғида ҳаракатлангани сабаб бўлган.

ЙПХ инспектори юк машина ҳайдовчисига қоидабузарлик содир этилганини айтган ва ҳужжатларини тақдим этишини сўраган. Бироқ ҳайдовчи А.С. инспекторнинг қонуний талабига бўйсунмасдан, автомобилни ҳайдаб кетиб қолган. Инспектор алоқа воситаси орқали кейинги чорраҳада турган бошқа бир инспектордан юк машинасини тўхтатишни сўраган ва ўзи ҳам ўша ерга етиб борган. Бироқ ҳайдовчи бу ерда ҳам ҳужжатларини тақдим этмасдан, инспектор билан тортишган, уни телефонига тасвирга олган.

Шундан сўнг инспектор икки нафар холис иштирокида юк машина ҳайдовчиси А.С.дан яна ҳужжатларини сўраган ва ҳужжатлар тақдим этилгач, қоидабузарлик бўйича белгиланган тартибда баённома расмийлаштирган.

Қоидабузарликка нисбатан қонуний чора кўрилгани ҳайдовчига ёқмаган ва у бироз ўтиб, қўлида тош билан қайтиб келган. У билан талашиб, ҳақоратлаб, сўкиниб, ҳужум қилмоқчидек ҳаракатлар содир этиб, норозилигини билдирган.

Қибрай тумани ИИБ томонидан ушбу ҳайдовчи топиб келинган ва у билан суҳбат ўтказилган. Ҳужжатлар расмийлаштирилиб, судга юборилган.

2 апрель куни Жиноят ишлари бўйича Қибрай туман судида фуқаро А.С. Маъмурий жавобгарлик тўғрисидаги кодекснинг 183-моддаси (майда безорилик) ва 194-моддаси (ички ишлар органлари ходимининг қонуний талабларини бажармаслик) 1-қисмида кўрсатилган ҳуқуқбузарликларни содир этган дея топилиб, унга нисбатан 15 сутка маъмурий қамоқ жазоси белгиланган.

Аввалроқ Тошкентда қоидабузар автоблогерни чора кўрмай, қўйиб юборган ЙПХ ходими ва унинг бошлиғига чора кўрилгани тўғрисида хабар берилганди.