Xiaomi бир дақиқа ичида 200 минг дона Mi 11 Pro ва 11 Ultra смартфонларини сотди

Xiaomi компанияси сотувга чиқарган янги флагманларига оид ҳисобот билан бўлишди, деб хабар беради Hi-Tech.Mail.ru.

Маълум қилинишича, янги Mi 11 Pro ва 11 Ultra флагманлари сотуви бошланганидан бир дақиқа ўтиб, 1,2 миллиард юанлик (180 миллион доллардан ортиқ) қурилма сотилган. Савдоларнинг асосий улуши ҳамёнбоп модель ҳисобига тўғри келаётгани инобатга олинса, 200 минг донадан ортиқ смартфон сотилган бўлиб чиқади.

Компаниядагиларнинг таъкидлашича, Xiaomi Mi 11 Ultra’нинг барча модификациялари бир зумда сотилган — ҳозирда қурилмадан қолмаган.

Айни вақтда AliExpress орқали Xiaomi ассортиментларидан «деярли флагман» бўлган Poco X3 Pro’ни харид қилиш мумкин. 2 апрелга қадар уни 50 доллар чегирма билан харид қилса бўлади — 6/128 гигабайтлиси 199 доллар ёки 8/256 гигабайтлиси 249 доллар.

Xiaomi Mi 11 Pro ва 11 Ultra компания томонидан март охирида ўтказилган кенг кўламли тақдимотда намойиш этилганди. Смартфонлар кремний-кислородли анодга эга янги турдаги аккумулятор ҳамда Xiaomi тарихида биринчи бор IP68 стандарти билан жиҳозланган.

Mi 11 Pro нархи 5000 юандан (787 доллар), Mi 11 Ultra — 5999 юандан (918 доллар) бошланади. Xiaomi ушбу қурилмаларини Хитойдан ташқарида сотиш-сотмаслиги ҳозирча номаълум.

Аввалроқ Xiaomi букланадиган смартфон, янги ноутбуклар ва янгиланган логотипини тақдим этгани тўғрисида хабар берилганди.