Ўзбекистон миллий терма жамоаси бош мураббийи Вадим Абрамов Гана Б жамоасига қарши ўртоқлик ўйинидан (2:1) сўнг ўз фикрлари билан ўртоқлашди, деб хабар бермоқда «Championat.asia».
Ўйин ҳақидаШунингдек, Гана устози Иброҳим Танко ҳам матбуот анжуманида иштирок этди.Ўйин ҳақида нима дейиш мумкин? Биринчи навбатда мухлисларга миннатдорчилик билдираман. Бундай ажойиб муҳитда тўп тепиш доим ёқимли. Ўйин уларга манзур келган бўлса, биз бундан хурсандмиз. Гана яхши жамоа эканлигини кўрдингиз. Ғалаба қозониш ва мухлислар ишончини олиш яхши.
Марказий ҳимояда ўйнаган Азим Аҳмедовнинг ўйини ҳақида
Унинг кўрсатган ўйинини ёмон дея олмайман. Бу чизиқда муаммолар борлиги сабаб унга имконият бериб кўрдик. Умид қиламанки, ҳаммаси кўнгилдагидек бўлади. Биз барчага имконият берамиз. Ўзбекистон паспортига эга барча футболчилар терма жамоага номзод. Суперлигада эндигина учта тур ўтди. Кейинги ўйинларни яна кузатамиз. Наманганлик футболчилар кучлилигини кўрсаца, яхши даражада тўп тепса, чақирув олади.
Жамоанинг вазиятлардан фойдалана олмаётгани ва Элдор Шомуродовдан кўп нарса кутилгани ҳақида
Хорижда ўйнаётган легионерлар узоқ парвозларни амалга ошириб етиб келди. Уч кун ичида тикланди ва мослашди. Ҳамма футболчилар ҳар хил ҳолатда эди. Элдор Шомуродовни вақтлироқ захирага олишни режалаштиргандим. Тўғри, у вазиятлардан фойдалана олмади. Кейинги учрашувда унинг ҳолати янада яхшироқ бўлади деб ўйлайман.
Дарвозабоннинг хатоси ҳақида
Дарвоза чизиғи муаммоли чизиқлардан бири ҳисобланади. Терма жамоага номзод дарвозабонларни кўздан кечиришда давом этамиз. Майдондаги қолган футболчилар ҳам хатоларга йўл қўйди. Лекин уларни ҳеч ким пайқамади. Дарвозабонда доим масъулият юқори бўлади. Илёсов иқтидорли дарвозабон.
Яна қайтараман дарвоза чизиғи оғриқли нуқтамиз. Марказий ҳимоячиларни яна кўрамиз. Шу нуқта ҳам муаммомиз ҳисобланади.
Ироқ билан ўйинда қандай ўзгаришларга қўл урмоқчилиги ҳақида
Ҳозир қайноқ кайфиятда бирор фикр билдириш қийин. Эртага барчаси аниқ бўлади. Кимдир жароҳат олган, яна кимдадир бошқа муаммо бор. Наманган шаҳрига ва мухлисларга яна бир бор раҳмат айтаман.
Вадим Абрамов, Ўзбекистон миллий терма жамоаси бош мураббийи
Бугун иккала жамоа ҳам яхши ўйнади. Биз иккита жиддий хатога йўл қўйдик ва рақиб голлар урди. Йигитларим ҳисобни тенглаштиришга ўзларида куч топа олди. Ўзбекистон терма жамоасини ғалаба билан табриклайман.Иброҳим Танко, Гана Б терма жамоаси бош мураббийи
Эслатиб ўтамиз, Ўзбекистон 29 март куни Ироқ терма жамоасига қарши ўртоқлик ўйини ўтказади.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)