Россия ва Хитойнинг COVID-19’га қарши вакциналар етказиб бериш соҳасидаги ҳаракатлари туфайли Европа янги турдаги жаҳон урушига дуч келди, деб таъкидлади Франция президенти Эмануэл Макрон. Бу ҳақда «Коммерсантъ» хабар берди.
Унинг фикрига кўра, Европа мамлакатлари вакциналар масаласида бошқаларга қарам бўлмаслик учун зарур чораларни кўриши керак.
«Вакциналар етказиб бериш орқали бошқаларга таъсир ўтказишга уринаётган Россия ва Хитой билан иш олиб бориб, биз янги турдаги жаҳон урушига дуч келдик», — дея Макроннинг сўзларидан иқтибос келтирди Figaro газетаси.
«Бу масалада бизга суверенитет керак. Биз ўзимиз вакцина ишлаб чиқара олиш ҳолатида бўлишмиз лозим. Ҳозир биз иккинчи авлод вакциналарини ишлаб чиқаришга тайёргарлик кўряпмиз», — деди Франция президенти. Унинг фикрига кўра, коронавирус ҳеч қаерга кетмайди, шунинг учун Европа Иттифоқининг COVID-19 штаммларига қарши туришини таъминлаш учун ишлаш керак.
Аввалроқ Франция Ташқи ишлар вазирлигининг Европа ишлари бўйича давлат котиби Клеман Боннинг таъкидлашича, Франция июнь ойида Россиянинг «Спутник V» коронавирусга қарши вакцинасини қўллаши мумкинлигини истисно қилмайди. Бунга препарат Европа Дори-дармон воситалари агентлигининг текширувидан ўтиши керак.
Аввалроқ Франция президенти Эммануэль Макрон аҳолини коронавирусга қарши эмлаш имкониятларини максимал даражада оширишга чақирди. Эмлаш марказига ташрифи давомида Макрон вакцинация «максимал» бўлиши ва ҳафтанинг етти кунида «эрталаб, тушдан кейин ва кечқурун» ўтказилиши кераклигини айтди.
Изоҳ (0)