Британиялик рассом Саши Жефри томонидан чизилган The Journey оf Humanity («Инсоният саёҳати») номли дунёдаги энг катта картина Дубайдаги хайрия аукционида 62 миллион долларга сотилди, деб хабар беради Esquire.
Жафри картинани Дубайдаги «Атлантис» меҳмонхонасининг бал залида ўтган йилнинг мартидан — БААдан локдаун эълон қилинганидан бошлаб етти ой давомида чизган. Холст ўлчами 1,6 минг квадрат метрга тенг — бу тўртта баскетбол майдони демак. Картинани яратишда Жафри 1065 та мўйқалам ва 6,3 минг литр бўёқдан фойдаланган.
Аввалига Жафри ўз ишини 70 қисмга бўлиб, уларни алоҳида 30 миллион долларга сотмоқчи бўлган. Бироқ полотнони криптовалютага ихтисослашган фирма раҳбари бўлган Андре Абдун исмли франциялик бутунлигича сотиб олган. Йиғилган маблағлар УНИCEФ, ЮНЕСКО, The Global Gift Foundation ва Dubi Caras каби хайрия фондларига йўналтирилади.
2020 йилнинг сентябрида Гиннеснинг рекордлар китоби The Journey оf Humanity’ни дунёдаги энг катта холст дея тан олганди. Рассомнинг сўзларига кўра, асар «сеҳрли реализм» услубида яратилган. Картинада 140 та мамлакатдан бўлган болалар турли ҳиссиётларини ифода этган ҳолда тасвирланган. Мавзу жиҳатидан картина тўрт қисмга бўлинган: Ер қалби, табиат, инсоният ва коинот.
Мазкур холст унинг ижодкори тирик бўлган дунёдаги энг қиммат иккинчи картинага айланди. 2018 йилда Дэвид Хокнининг «Рассом портрети» (икки фигурали бассейн) картинаси 90,3 миллион долларга сотилган.
Аввалроқ таниқли кўча рассоми Бэнксининг суперқаҳрамон-ҳамшира ҳақидаги сурати аукционда қарийб 17 миллион фунтга сотилган эди.
Изоҳ (0)