Польшада 20 мартдан 9 апрелгача қатъий карантин жорий қилинди. Янги карантиннинг бошланиши ҳақида 17 март куни мамлакат соғлиқни сақлаш вазири Адам Недзельский хабар берган эди, деб ёзмоқда «Интерфакс».
Шу вақтга қадар бу каби қатъий чекловлар мамлакатнинг бир нечта ҳудудларида амал қилаётган эди, лекин энди Польшанинг барча ҳудуди учун жорий қилинди.
Карантин даврида меҳмонхоналар, савдо марказларидаги кўплаб дўконлар, дам олиш масканлари, кинотеатрлар, музейлар, шунингдек, бассейн ва спорт мажмуалари фаолияти тўхтатилади. Мактаб ўқувчилари дарсларини масофавий тарзда давом эттиради.
Недзельский пандемияга қарши курашда масофадан туриб ишлаш муҳимлигини таъкидлади ва иш берувчиларни иложи борича тезроқ масофавий шаклга ўтишга чақирди. «Биз ҳар куни тирбандликларга қараб кузатаётган ҳаракатнинг интенсивлиги ва гавжумлигидан хавотирдамиз. Мен барча иш берувчиларга мурожаат қиляпман, барча давлат идораларининг иш берувчилари, иложи борича тезроқ масофавий иш тартибига ўтинг», — деди вазир.
Коронавирус билан касалланганлар сони бўйича Польша дунёда 14-ўринда. Мамлакатда 2 миллиондан ортиқ аҳоли коронавирус билан касалланган, 48 минг киши вирус қурбонига айланган. Касалланиш нисбати бўйича эса 44-ўринда турибди — бир миллион кишига 53 мингта вирусга чалиниш ҳолати. Ўлим ҳолатлари нисбати бўйича эса 27-ўринда — бир миллион кишига 1291 та ўлим ҳолати.
Маълумот учун, Польшада ўтган йили 1946 йилдан буён максимал даражада кўп инсон вафот этди. Салкам 477 минг киши вафот этган — бу 2019 йилги кўрсаткичларга қараганда тахминан 67 мингга кўп. Дастлабки маълумотларга кўра, Польша аҳолиси 2020 йил охири ҳисоблари бўйича 38 миллион 268 мингни ташкил этмоқда. Мамлакат аҳолиси 2019 йил билан таққосланганда 115 минг кишига камайган.
Аввалроқ февраль ойидан Польшадан чиқариб юборилган Россиянинг Познан шаҳридаги бош консули Игор Ошепков коронавирус билан касаллангани ва фуқароларнинг ҳаётини хавф остига қўйиб, ўзини изоляция қилмагани ҳақида хабар берилган эди.
Изоҳ (0)