Ҳукуматнинг 16 мартдаги тегишли қарорлари билан Термиз давлат университетининг Педагогика институти ҳамда Қарши давлат университетининг Педагогика институти фаолиятини ташкил этишга доир чора-тадбирлар белгиланди, деб хабар бермоқда ЎзА.
Унга кўра, иккала институт ҳам ўқув жараёнини 2021/2022-ўқув йилидан бошлайди.
Ўқувчиларни педагогик касбга йўналтириш мақсадида Сурхондарё ва Қашқадарё вилоятларидаги етакчи мактабларнинг 10 тасида 3—4-синф ўқувчилари учун «Ўқиш ва математик саводхонлик бўйича синфлар», 8—9-синф ўқувчилари учун «Математик ва табиий фанлар саводхонлиги бўйича синфлар», 10—11-синф ўқувчилари учун «Педагогик синфлар» ташкил этилади ва институтлар таклифи асосида дарс жараёнига таъсир этмаган ҳолда ўқув жараёнларига ўзгариш киритилади.
Термиз давлат университетининг Педагогика институтига Тошкент давлат педагогика университетининг Термиз филиали бино ва иншоотлари ҳамда собиқ Музработ агросервис касб-ҳунар коллежи бино ва иншоотлари тегишли ҳудуди билан биргаликда институтга оператив бошқарув ҳуқуқи асосида текин берилди.
Қарши давлат университетининг Педагогика институтига эса Тошкент давлат техника университетининг ҳамда Тошкент давлат педагогика университетининг Шаҳрисабз филиалининг бино ва иншоотлари тегишли ҳудуди билан биргаликда институтга оператив бошқарув ҳуқуқи асосида текин берилди.
Эслатиб ўтамиз, Шавкат Мирзиёевнинг 2020 йил 27 февралдаги «Педагогик таълим соҳасини янада ривожлантириш чора-тадбирлари тўғрисида»ги қарори билан республикадаги 5 та университет қошида Педагогика институтлари ташкил этилганди.
Аввалроқ Тошкентда Diplomat university номли хусусий университет ва Тошкент амалий фанлар университети очилиши кутилаётгани ҳақида хабар берилган эди.
Изоҳ (0)