Француз актрисаларининг маҳоратига қойил қолмай илож йўқ. Шунингдек, орадан йиллар ўтса-да, машҳур актрисаларнинг аксарияти ташқи кўриниш борасида ҳам омадли ҳисобланади. Дунё бўйлаб инсонларнинг севимли актрисаси бўлиб қолишнинг сири нимада бўлиши мумкин?
Изабел Ажани
Изабел 12 ёшиданоқ ҳаваскор театрда кичик ролларни ижро этган. 15 ёшида эса биринчи марта «Кичкина кўмирчи» фильмида суратга тушган. Француз актрисаси ва хонандаси «Энг яхши актриса» номинацияси бўйича 5 маротаба «Цезарь» мукофотини қўлга киритган. Изабелнинг кўк кўзлари бавариялик онасидан, қора сочлари эса жазоирлик отасидан ўтган.
«Мен гўзал бўлмай қолишдан эмас, аксинча гўзал бўлишдан қўрқаман».
Брижит Бардо
Бой ҳамда диндор оиланинг қизи доим актриса эмас, балерина бўлишни хоҳлаган. Лекин режиссёр Роже Вадим уни «Elle» журнали муқовасида кўргандан сўнг фильмда суратга тушишга таклиф этади. Кейинчалик улар оила қурганидан кейин актрисани бошқа фильмлар учун ҳам тавсия қилган. У гўзаллиги туфайли ҳам ҳаётда кўп қийинчиликларга дуч келди. Актриса иккинчи турмуш ўртоғи Жак Шаренинг рашки туфайли ўзини осишга ҳам уринган, шундан сўнг қариндошларининг тақиқига кўра, кичик ўғли билан мулоқот қила олмаган.
«Орзусиз содиқ бўлишдан кўра, садоқатсиз бўлиш яхшироқдир».
Катрин Денев
17 ёшида уйидан қочиб кетган Катрин режиссёр Роже Вадим билан яшай бошлаган. 19 ёшида эса ўғлини дунёга келтирган. Унинг сўзларига кўра, оддий ҳаёт кечириши ҳам мумкин эди. Шунинг учун ҳам ҳеч қачон алоҳида эътиборни ёқтирмаган. Катриннинг 25 ёшли актриса опаси Француаза автоҳалокатда вафот этган бўлиб, ушбу фожиа Катринга жуда қаттиқ таъсир қилган.
«Аёл ақлли, дилбар, хушмуомала ва бироз ҳазил туйғусига эга бўлиши керак. Айнан шу фазилатлар эркакларга ёқади».
Мишел Мерсе
Мишел ҳам болалигидан балерина бўлишни орзу қилар эди. У 17 ёшигача ўжарлик қилиб, балет билан шуғулланди. Актриса ижро этган Анжелика роли жаҳон миқёсида юлдуз бўлиб танилишига ёрдам берди. Аммо бир вақтнинг ўзида бу ҳам мукофот, ҳам жазо эди. Унинг мазкур ролидан кейинги бошқа ижролари машҳурлик борасида унга тенглаша олмади. Шунингдек, у тўрт маротаба турмуш қурган бўлса-да, шахсий ҳаётида бахтини топа олмаган.
«Менинг ташқи кўринишим нафақат ғалаба ва эркакларга ёқиш, балки жуда кўп азоб-уқубатларни ҳам келтириб чиқарди».
Карол Буке
Нозик, мураккаб ва сирли. У экранларда энг кўп ҳавас қилинадиган аёллардан бири. Актриса «Сиз учун жуда чиройли» мелодрамасидаги роли билан «Цезарь» мукофотига сазовор бўлган. Суратга олиш майдончасида актёр Жерар Депарде билан танишган. Улар орасидаги ишқий муносабат тахминан 10 йил давом этган бўлса-да, расмий равишда оила қурмаган. 15 йил давомида Карол Буке Chanel’нинг юзи ва Christian Dior учун намуна бўлган. Ҳозирда актриса нафақат фильм ва театрларда роль ижро этади, балки турли хил кинофестивалларда ҳакамлар ҳайъати аъзосидир.
«Гўзаллик ҳаёт завқини ўз ичига олади».
Фанни Ардан
Энг севимли киноюлдузлардан бири, Монако қироллик оиласи сарой бошқарувчисининг қизи. У болалигидан аристократ муҳитга ўрганган ва дипломатик карьера учун ҳаракат қилган. Актриса фаолияти давомида 60 дан ортиқ турли жанрдаги фильмларда суратга тушган. 1980 йилларнинг бошларидан Фанни «интеллектуал» актриса сифатида машҳур бўлган. У бутун дунё бўйлаб, шу жумладан, Голливуднинг энг таниқли режиссёрлари томонидан фильмларда роль ўйнашга таклиф қилинган. Актрисанинг уч нафар қизи бор, афсуски, у ҳеч бир фарзандининг отаси билан турмуш қурмаган.
Одри Тоту
Актриса ҳеч қачон ўз ёшини кузатмаслигини ва ҳаттоки ёши нечада эканлигини ҳам унутиб қўйишини тан олди. Голливуддагилар эса Одри Тотуни Францияга инъом этилган круассанлардан кейинги энг яхши ҳадя деб билади. Унга «Амелия» картинасидаги роли машҳурлик келтирди. Одри ҳамиша шахсий ҳаётини оммадан яширишга уринган, шунинг учун ҳам бу ҳақда деярли ҳеч нарса маълум эмас. Шунингдек, у турмушга чиқиш, оила қуришга шошилганича йўқ. Чунки у ҳақиқий севгини фақатгина ўз хоҳишига кўра келади, деб билади.
«Мен инсонлардаги нозиклик ва эҳтиёткорликни қадрлайман. Улар билан доимо ёнма-ён бўлишни истайман».
Софи Марсо
Актриса 14 ёшида «Бум» ва «Бум 2» фильмлардаги ижроси билан юлдузга айланган. У «Энг яхши дебют ва истиқболли актриса» сифатида «Цезарь» мукофотига сазовор бўлган. 16 ёшида биринчи турмуш ўртоғи 42 ёшли режиссёр Анжей Жулавский билан учрашган. У билан биргаликда Польшага ҳам кўчиб кетган эди. Ҳозирда эса у суратга тушиш ишларини давом эттирмоқда ҳамда Европанинг энг чиройли актрисалари рўйхатига киритилган.
«Ёлғиз қолишни истамайман, аммо билмайман, аёл ёлғиз ўзи бахтли бўлиши мумкинми?»
Марион Котийяр
Унинг ажойиб кўзлари об-ҳаво ҳамда кайфиятга қараб кўк ёки кул рангга ўзгаради. Актриса қўшиқ куйлашни яхши кўради. Унга «Пушти ҳаёт» фильми 2008 йилда «Энг яхши актриса» номинацияси бўйича «Оскар» мукофотини олиб келган, шунингдек, «Олтин глобус» мукофотига ҳам сазовор бўлган.
«Илгари ўзимдаги ҳеч нарса ёқмас эди: ташқи кўринишим, шахсиятим. Мен жуда ғазабнок эдим».
Жюлет Бинош
Актриса маҳаллий французлар учун чет эллик, чет элликлар учун француз. Бундан ташқари, актриса француз киносининг рамзи ҳам саналади. Жюлет турли нашр ва сўровномалар томонидан бир неча бор энг яхши кино юлдузларидан бири сифатида тан олинган.
«Француз аёллари 40 ёшида гуллайди».
Изоҳ (0)