Қибрайдаги ариқдан ҳар куни қон оқаётгани, у Олмазор тумани марказидаги сузиш ҳавзасига қуйилиши ҳақида хабар берилганди. Ветеринария ва чорвачиликни ривожлантириш давлат қўмитаси ҳолат қўмита масъуллари томонидан жойига бориб ўрганилганини маълум қилди.
Ўрганиш натижаларига кўра, сувга қонли чиқинди оқизаётган «Обод Савдо Бизнес» МЧЖга қарашли ихтисослаштирилган сўйиш корхонасида ветеринария-санитария қоидалари ва меъёрлари бузилганлиги, яъни кушхонадан чиққан чиқиндилар ҳақиқатан ҳам ариққа оқизилаётганлиги маълум бўлган.
Аниқланган камчиликларни 5 кун муддат ичида зудлик билан бартараф этиш чораларини кўриш бўйича ветеринария мутахассислари томонидан зарур кўрсатмалар берилган ва огоҳлантириш хати юборилган.
Эслатиб ўтамиз, ҳар кун икки-уч маҳал қон оқиши айтилган Тошкент шаҳридан 2 километр наридан ўтган мазкур ариқ Қибрай туманидан ўтувчи Қорақамиш каналига қўшилади. Бу канал эса Тошкент шаҳрининг Қорақамиш мавзесидан ўтиб, Олмазор туманининг марказидаги сузиш ҳавзасига қуйилади. Ариқ бўйидаги аҳоли қонли ариқ бўйича 3 йил мобайнида кўп жойга мурожаатлар қилган, аммо натижа бўлмаган.
Изоҳ (0)