Самарқанддаги кафе яқинида жанжаллашган шахслар бир-бирларига даъволари йўқлигига қарамай, 3 суткага қамалди

Самарқанддаги кафеда жанжаллашган шахсларнинг уч нафари бир-бирларига даъволари йўқлигига қарамай, 3 суткага қамалди, яна бири жаримага тортилди. Бу ҳақда ИИВ Тергов департаменти хабар берди.

Маълум қилинишича, 27 февраль куни соат 23:00 ларда Панжикент кўчасида жойлашган оилавий овқатланиш ошхонасидан 26 ёшли Шахром А. таниши Бахтиёр Б. билан маст ҳолда ташқарига чиқиб, баланд овозда турли ҳақоратли сўзлар билан гаплашиб, ушбу ошхонага туғилган кунини ўтказиш учун келган 47 ёшли Баходир К. томонга қараб бақирган ва танбеҳ бергани ёқмаганлиги оқибатида унинг ёқасидан ушлаганларида Баходир К.нинг ўғли 20 ёшли Асадбек А., ҳамда жияни 27 ёшли Дамир К. келиб уларни ажратиб, маст ҳолдаги Шахром А. Бахтиёр Б. билан жанжаллашиб кетган.

Ушбу жанжални кўрган фуқаролар уларни ажратиб, яраштириб уйларига кетказиб юборган.

Олиб борилган терговга қадар текширув ҳаракатлари давомида юқорида кўрсатилган фуқаролар бир-бирларига даъвоси йўқлигини, ариза ёзишдан бош тортишларини ва суд тиббий экспертизадан ўтмасликларини билдирган.

Лекин ушбу фуқаролар жамиятда юриш-туриш қоидаларини қасддан менсимасдан жамоат тартибини бузгани юзасидан ҳудуд профилактика инспектори томонидан тегишли тартибда Маъмурий жавобгарлик тўғрисидаги кодексининг 183-моддаси 1-қисми (майда безорилик) билан баённома расмийлаштирилиб, жиноят ишлари бўйича Самарқанд шаҳар судига тақдим қилинган.

Суд қарорига кўра, Шахром А., Бахтиёр Б., Дамир К., Асадбек А.га нисбатан 3 сутка маъмурий қамоқ ва Бахтиёр Б.,га нисбатан базавий ҳисоблаш миқдорининг 3 баравари, яъни 735 000 сўм миқдорида жарима жазоси тайинланган.