Америкалик актёр Алек Болдуин 62 ёшида еттинчи марта ота бўлди. Бу ҳақда унинг 37 ёшли рафиқаси Ҳилария Instagram саҳифасида маълум қилди, деб ёзмоқда «Korrespondent.net».
Янги туғилган чақалоқнинг исми ва жинси ҳақида маълумот берилмаган. Актёрнинг рафиқаси атиги олти ой олдин ўғил туғгани сабабли чақалоқни суррогат она дунёга келтиргани тахмин қилинмоқда.
Болдуиннинг рафиқаси олтита фарзанди, шу жумладан, янги туғилган чақалоқ билан тушган суратини саҳифасига жойлади. Алекнинг собиқ турмуш ўртоғи – актриса Ким Бейсингер билан турмушидан 24 ёшли қизи ҳам бор.
Болдуин 2012 йилда ёга бўйича мураббийи Ҳилария Томас билан оила қурган. Жуфтликнинг етти ёшли қизи Кармен ва тўрт ўғли бор: беш ёшли Рафаэл, тўрт ёшли Леонардо, икки ёшли Ромео ва олти ойлик Эдуардо.
Аввалроқ Болливуднинг энг машҳур жуфтликларидан бири Саиф Али Хон ва Карина Капур иккинчи марта ота-она бўлгани ҳақида хабар берилган эди.
Изоҳ (0)