Арманистон президенти бош вазир Пашинян талаби билан Бош штаб раҳбарини ишдан бўшатишга рози бўлмади. Пашинян арзномани қайтадан киритди ва барчани митингга чақирди

Арманистон президенти Армен Саркисян бош вазир Никол Пашиняннинг Қуролли Кучлар Бош штаби бошлиғи Оник Гаспарянни ишдан бўшатиш ҳақидаги таклифини имзолашдан бош тортди, деб ёзади Meduza президент матбуот хизматига таяниб. Гаспарян бош вазир истеъфосини талаб қилган эди.

Бош штаб бошлиғини ишдан бўшатиш ҳақидаги буйруқ лойиҳасини президент аппарати ўрганиб чиққан ҳамда ҳуқуқшунослар ва экспертлар билан батафсил муҳокама қилинган. Улар ташаббус «бутунлай Конституцияга зид» деган хулосага келган.

Баёнотда айтилишича, Арманистон президенти «ҳеч қандай сиёсий кучни қўллаб-қувватламайди» ва «фақат миллий манфаатлар»дан келиб чиқади. Шунингдек, таъкидланишича, «қуролли кучлар сиёсий масалаларда нейтрал (бетараф) бўлиб қолиши керак».

«Шу нарса аниқ-равшанки, Тоғли Қорабоғдаги уруш муносабати билан Қуролли кучларнинг шахсий таркиби бизнинг кўмагимизга ва эътиборимизга ҳар қачонгидан кўра кўпроқ эҳтиёжманд… Жорий вазият мисли кўрилмаган бўлиб, тизимли ва комплекс ечимларни талаб қилади, мамлакатда жорий вазиятни ҳисобга олмасдан туриб, персонални тез-тез алмаштириш йўли билан ҳал қилиб бўлмайди», — дейилади баёнотда.

Шундан кейин Никол Пашинян президент Армен Саркисянга Бош штаб бошлиғини ишдан бўшатиш ҳақидаги арзномани қайтадан юборганини маълум қилди. «Республика президенти Бош штаб бошлиғини ишдан бўшатиш ҳақидаги буйруқ лойиҳасини бош вазир аппаратига қайтариб юборишга қарор қилди. Бу қарор ҳеч ҳам вазиятни ҳал қилишга ёрдам бермайди», — деб ёзди у ўз Facebook саҳифасида. У тегишли тартибда ишдан бўшатиш ҳақидаги арзномани яна президентга юборганини айтди. «Буйруқ белгиланган тартибда имзоланишини кутмоқдаман», — деди бош вазир.

У ўз ватандошларини Еревандаги Республика майдонига митингга чиқишга чақирди. «1 март, душанба куни соат 18:30 да (Тошкент вақти билан 19:30) барчани митинг ва юриш бўлиб ўтадиган Республика майдонига таклиф қиламан», — деб ёзди Пашинян Facebook’даги саҳифасида.

Арманистон бош вазири Никол Пашинян президентга Бош штаб раҳбари Оник Гаспарянни лавозимидан бўшатишни таклиф қилишига унинг юқори мансабли ҳарбий хизматчиларнинг Пашиняндан истеъфога чиқишни талаб қилувчи баёнотини имзолаши сабаб бўлди. Бош вазир ҳарбийларнинг хатти-ҳаракатларини давлат тўнтаришига уриниш деб атади. Ереванда унинг тарафдорлари ва унга қарши бўлганларнинг митинглари бошланди.

Агар Арманистон бош вазири президентга Қуролли Кучларнинг олий қўмондонлик таркиби вакилини ишдан бўшатиш ҳақидаги қонунчилик акти билан мурожаат қилса, президент уч кун ичида актни бош вазирга эътироз билан қайтариши мумкин. Агар у эътирозни қабул қилмаса, президент актни имзолаши ёки Конституциявий судга мурожаат қилиши керак бўлади.