Чехияликлар учун 25 февралдан бошлаб одам гавжум жойларда респиратор, нанониқоб ёки бирданига иккита тиббий ниқоб тақиш мажбурияти жорий этилди. Бу ҳақда «РИА Новости» хабар берди.
Чехия соғлиқни сақлаш вазири Ян Блатнинига кўра, бу тартиб коронавируснинг «британча» штамми кенг тарқалиши билан боғлиқ. Янги талаб, хусусан, дўконлар, касалхоналар, жамоат транспорти ва бекатларга нисбатан қўлланилади.
«25 февралдан бошлаб белгиланган жойларда фуқаролар юзига FFP2 турдаги респиратор, нанониқоб ёки бир вақтнинг ўзида иккита тиббий ниқоб тақиши керак бўлади», — деди Блатни.
Унинг сўзларига кўра, Вазирлар маҳкамаси ижтимоий ҳимояга муҳтож қатлам учун компенсация ажратиш масаласини ҳали кўриб чиқмади. Иқтисодчиларнинг ҳисобига кўра, бир ойда тўрт кишидан иборат оилага бир марталик респираторлар учун 2000 крона (тахминан 988 500 сўм) керак бўлади.
Ҳукумат респиратор тақиш мажбуриятини жорий этмоқчилиги ҳақидаги янгиликлардан кейин, сўнгги кунларда бу маҳсулотлар ҳар куни дорихоналарда ҳам, дўконларда ҳам сотилиб кетяпти. Энг арзон респираторлар интернет дўконларда деярли тўлиқ сотиб тугатилди.
Кўпчилик пулни иқтисод қилиш мақсадида битта респираторни узоқ муддат ишлатади, бу эса ҳимоя воситасини вирус ташувчи қўшимча манбага айлантиради, деб хавотир билдирди тиббиёт ходимлари.
Чехияда фавқулодда ҳолат эълон қилиниб, соат 21:00 дан 05:00 гача комендантлик соати жорий этилди. Ғарбдан Хеб ва Соколов, шарқдан Трутнов шаҳарлари кириш ва чиқиш учун ёпилди. У ерда коронавирус билан касалланганлар сони мамлакат бўйича ўртача кўрсаткичдан уч-тўрт баробар кўп.
Аввалроқ Германияда ҳам карантин муддати узайтирилгани, аҳолига тиббий ва респираторли ниқобларни тақиш мажбурий қилингани ҳақида хабар берилган эди.
Изоҳ (0)