Японияда Pfizer флаконидан олтита дозанинг ҳаммасини олишга мўлжалланган махсус шприцларнинг етишмаслиги сабаб аввал режалаштирилгандан кўра камроқ одам коронавирусга қарши эмланиши мумкин. Бу ҳақда The Japan Times газетасига таяниб «Интерфакс» хабар берди.
«Японияда ишлатилаётган шприцлар Pfizer флаконидан фақат бешта дозани чиқара олади. Бизда бор бўлган олтита дозани чиқариб берувчи барча шприцдан фойдаланамиз. Лекин, албатта, улар етарли бўлмайди», — деди мамлакат соғлиқни сақлаш вазири Норихиса Тамура.
Pfizer вакцинани олти дозали махсус флаконда етказиб беради. Лекин флакондан олтинчи дозани олиш учун Японияда ишлатилаётганидан фарқли, махсус шприц керак.
Японияда ҳар бир флакондаги олтита дозанинг фақат бештасидан фойдаланиш мумкин, бу 60 миллион кишини Pfizer вакцинаси билан эмлашга имкон беради, лекин аввалроқ расмийлар вакцина дозалари 72 миллион кишига етишини айтган эди.
Pfizer вакцинаси ҳозирча Япония Соғлиқни сақлаш вазирлиги томонидан ўрганиляпти. 15 февраль куни вакцина маъқулланиши мумкин. Шунингдек, AstraZeneca ҳам рўйхатдан ўтиш учун ариза берган.
Япония ҳукумати 17 февралдан тиббиёт ходимларини вакцинация қилишни бошлашни режалаштирмоқда.
Пандемия бошидан буён Японияда 406 мингта коронавирусга чалиниш ҳолати рўйхатга олинди, 6,4 минг киши вирус қурбонига айланди.
Изоҳ (0)